Maharashtra Politics : "त्यांना काही काळ मोकळं बसू देऊ या" : फडणवीसांचं एका वाक्यात उत्तर; भास्कर जाधवांचा हिरमोड

Maharashtra Politics : महाराष्ट्राच्या विधानसभेला विरोधी पक्षनेते पद मिळणार की नाही? या प्रश्नाचे उत्तर अर्थसंकल्पीय अधिवेशन संपत आले तरी मिळाले नव्हते. या पदासाठी शिफारस करण्यात आलेले शिवसेना उद्धव बाळासाहेब ठाकरे पक्षाचे आमदार भास्कर जाधव यांनी राज्य सरकारला आज (26 मार्च) दुपारपर्यंतचा अल्टिमेटम दिला होता. पण या अधिवेशनात विरोधी पक्षनेत्याची निवड होणार नसल्याचे जवळपास स्पष्ट झाले आहे. विधानसभा उपाध्यक्ष अण्णा बनसोडे यांच्या निवडीनंतर अभिनंदर प्रस्तावावर बोलताना मुख्यमंत्री देवेंद्र फडणवीस यांनी एका वाक्यात सूचक विधान करत याबाबतचे संकेत दिले.

अण्णा बनसोडे यांच्या अभिनंदनाचे भाषण संपल्यानंतर फडणवीस विधान परिषद सभागृहात जाण्यासाठी निघाले. त्याचवेळी समोर बसलेल्या काँग्रेस आमदार नाना पटोले यांनी शेजारच्या खुर्चीचे काय? असा सवाल विचारला. त्यावर अध्यक्ष राहुल नार्वेकर यांनी ते माझ्याकडे बघून बोला, असे पटोले यांना सांगितले. तर फडणवीस मिश्किलपणे म्हणाले, मी सांगतो. "त्यांना काही काळं मोकळं बसू देऊ या" असे सूचक विधान केले. त्याचवेळी त्यांनी हा अध्यक्षांचा निर्णय असल्याचे म्हणत बाजूच्या खुर्चीचा ज्यादिवशी अध्यक्ष घेतील तो आम्हाला मान्य असेल असे म्हणत त्यांनी सावरून घेतले. तर अध्यक्ष नार्वेकर यांनी घाईत घेऊ का निर्णय? असा सवाल केला. एकूणच हा संवाद ऐकून या अधिवेशनात तरी विरोधी पक्ष नेतेपदाचा निर्णय होणार नसल्याचे स्पष्ट झाले आहे.

विधानसभा निवडणुकीत महाविकास आघाडीतील प्रमुख तीन पक्षांपैकी एकाही पक्षाला विरोधी पक्षनेते पद मिळवण्या एवढ्या जागाही जिंकता आलेल्या नाहीत. पण विरोधी पक्षनेते पदाच्या निवडीसाठी जागांची कोणतेही अट नसल्याचे विधिमंडळ सचिवालयाने शिवसेना उद्धव बाळासाहेब ठाकरे पक्षाला उत्तर दिले आहे. पण त्याचवेळी विरोधी पक्ष नेता निवडीचे अधिकार विधानसभा अध्यक्षांना असल्याचेही त्यांनी सांगितले आहे. त्यामुळे विधानसभा अध्यक्षांनी ठरवलं तरच विरोधकांना हे पद मिळू शकते.

हिवाळी अधिवेशनानंतर मधल्या काळात महाविकास आघाडीच्या नेत्यांच्या बैठका पार पडल्या. त्यामध्ये विरोधी पक्षनेते पदासंदर्भात चर्चा झाली. महाविकास आघाडीतील घटक पक्षात हे पद संख्याबळानुसार शिवसेना उद्धव बाळासाहेब ठाकरे पक्षाला देण्यात आले. त्यासाठी काँग्रेस व राष्ट्रवादी काँग्रेस शरद पवार गटाने देखील अनुकूलता दर्शवली. त्यानंतर या अधिवेशनापूर्वीच मातोश्रीवर झालेल्या बैठकीत विरोधी पक्षनेते पदासंदर्भात पक्षप्रमुख उद्धव ठाकरे निर्णय घेतील, असा ठराव करण्यात आला. त्यानंतर विधानसभा अध्यक्ष यांना पत्र देऊन विधानसभा विरोधी पक्षनेते पदासाठी ठाकरेंच्या शिवसेनेकडून विरोधी पक्ष नेते पदासाठी गटनेते भास्कर जाधव यांची शिफारस करण्यात आली आहे.