Solapur, 06 October : राष्ट्रवादी काँग्रेस शरदचंद्र पवार पक्षाकडून सोलापूर जिल्ह्यातील 11 मतदारसंघातून 65 हून अधिक इच्छुकांनी निवडणूक लढविण्याची तयारी दाखवली आहे. मोहोळ विधानसभा मतदारसंघातून सर्वाधिक 22 जणांना तुतारीच्या चिन्हावर निवडणूक लढवायची असून सोलापूर शहर उत्तर मतदारसंघातून एकमेव अर्ज आला आहे. राष्ट्रवादी काँग्रेसकडून निवडणूक लढू इच्छिणाऱ्यांची उद्या (ता. ०७ ऑक्टोबर) पुण्यात गुलटेकडी येथील निसर्ग कार्यालयात होणार आहे. यातील किती इच्छुकांना उमेदवारीची लॉटरी लागते, याकडे सोलापूरच्या राजकीय वर्तुळाचे लक्ष असणार आहे.
राष्ट्रवादी काँग्रेस शरदचंद्र पवार पक्षाचे (NCP SP) सोलापूरचे जिल्हाध्यक्ष बळीराम साठे आणि पक्ष निरीक्षक शेखर माने यांनी ही माहिती दिली. विधानसभा निवडणुकीच्या पार्श्वभूमीवर सर्वच राजकीय पक्षाकडून निवडणुकीच्या मोर्चेबांधणीला वेग आला आहे.
राष्ट्रवादी काँग्रेसकडून इच्छुकांच्या मुलाखतीला सुरुवात झाली असून विदर्भ आणि मराठवाड्यातील काही जिल्ह्यातील इच्छुकांच्या मुलाखती झाल्या आहेत. पश्चिम महाराष्ट्राच्या सोलापूर जिल्ह्यातील इच्छुकांच्या मुलाखती उद्या होणार आहेत.
लोकसभा निवडणुकीत महाविकास आघाडीला मिळालेल्या घवघवीत यशानंतर विधानसभा निवडणुकीच्या तोंडावर तुतारीवर निवडणूक लढवण्यासाठी राज्यात सर्वाधिक इच्छुकांची संख्या दिसून येत आहे. तशी संख्या ती सोलापूर जिल्ह्यातही (Solapur) दिसून येत आहे. त्यामुळे सोलापूरमधून राष्ट्रवादी काँग्रेसला किती जागा मिळतात आणि काेणाला उमेदवारी मिळते, याकडे सोलापूरचे लक्ष असणार आहे.
सोलापूर जिल्ह्यातील 11 मतदारसंघासाठी एकूण 65 हून अधिक इच्छुकांनी राष्ट्रवादी काँग्रेस शरदचंद्र पवार पक्षाकडे उमेदवारीची मागणी केली आहे. यामध्ये सर्वाधिक इच्छूक हे अनुसूचित जातीसाठी राखीव असलेल्या मोहोळ मतदार संघातून आले असून या मतदारसंघातून 22 जणांनी निवडणूक लढवण्याची इच्छा व्यक्त केली आहे.
मोहोळनंतर पंढरपूर मतदारसंघासाठी 17 इच्छुकांनी अर्ज केले असून माढ्यातून सात, सोलापूर शहर मध्यम मतदारसंघातून पाच, माळशिरसमधून तीन इच्छुकांनी निवडणूक लढवण्याची तयारी दाखवली आहे. करमाळा, बार्शी, दक्षिण सोलापूर, अक्कलकोट, सांगोला या मतदारसंघातून प्रत्येकी दोघांनी उमेदवारीची मागणी केली आहे. सोलापूर शहर उत्तर मतदारसंघातून मात्र एकमेव इच्छुक आहेत.
मागील 2019 च्या विधानसभा निवडणुकीत राष्ट्रवादी काँग्रेसने सोलापूर जिल्ह्यातील सात मतदारसंघातून निवडणूक लढवली होती. त्यापैकी तीन मतदारसंघातून पक्षाचे आणि पक्षाने समर्थन दिलेले आमदार निवडून आले आहेत, यावेळी राष्ट्रवादी काँग्रेस शरदचंद्र पवार पक्ष पाच मतदार संघात उमेदवार उतरवण्याची शक्यता आहे.
राष्ट्रवादी काँग्रेस पक्षाने काढलेली शिवस्वराज्य यात्राही मध्यंतरी सोलापूर जिल्ह्यातील पाच मतदारसंघातूनच गेली होती, त्यामुळे राष्ट्रवादी काँग्रेस शरदचंद्र पवार पक्ष सोलापूर जिल्ह्यात पाच मतदारसंघातूनच निवडणूक लढवण्याची शक्यता आहे
Edited By : Vijay Dudhale
सरकारनामाचे सदस्य व्हा
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
