Solapur Dcc Bank : अक्कलकोटच्या सहकाराचा कॅप्टन 48 वर्षांनंतर बदलणार : सिद्रामप्पा पाटलांच्या मोठ्या इनिंगनंतर कल्याणशेट्टींची DCC त होणार एन्ट्री

Solapur, 20 August : विविध कार्यकारी सेवा सहकारी संस्था मतदारसंघातून जिल्हा मध्यवर्ती सहकारी बँकेचे संचालकपद मिळविणे की तालुक्याची आमदारकी मिळविणे, यापैकी सोपे काय? याचे कोडे अनेकांना अजूनही सुटलेले नाही. अक्कलकोटच्या राजकारणात तर ते आणखी गहन आहे. अक्कलकोटमधून एकदा आमदारकी मिळविलेल्या (स्व.) सिद्रामप्पा पाटील यांनी तब्बल ४० वर्षे तालुक्यातून जिल्हा बँकेचे संचालकपद भूषविले आहे. त्यानंतर त्यांचे चिरंजीव शिवानंद पाटील हे २०१५ मध्ये संचालक झाले. आता अक्कलकोटमधील सोसायटी मतदारसंघातून आमदार सचिन कल्याणशेट्टी यांच्या रूपाने पाटील परिवाराशिवाय नवा चेहरा डीसीसीमध्ये दिसण्याची शक्यता आहे. त्यामुळे या तालुक्यातील सहकाराचा वारसा तब्बल ४८ वर्षांनी बदलत आहे.

अक्कलकोट तालुक्याच्या सोसायटी मतदारसंघातून शिवलिंगप्पा केसूर यांनी १९६५ ते १९७७ या कालावधीत बँकेचे संचालक म्हणून काम पाहिले. केसूर यांना संचालक होता आले. मात्र, आमदार होता आले नाही. त्यानंतर (स्व.) सिद्रामप्पा पाटील यांनी १९७८ ते २०१५ या कालावधीत अक्कलकोट तालुक्यातून संचालकपद भूषविले. आमदार कोणीही असो, जिल्हा बँकेचे परमनंट संचालक म्हणून (स्व) सिद्रामप्पा पाटील यांची ओळख होती.

आमदार सचिन कल्याणशेट्टी यांनी आमदारकीच्या पहिल्या टर्ममध्येच तालुक्याच्या सहकारात सुप्तपणे शिरकाव केला. त्यातूनच त्यांना दुधनी आणि अक्कलकोट बाजार समितीमध्ये यश मिळण्यास मदत झाली. अक्कलकोट तालुक्यात ९३ सोसायट्या असून, त्यापैकी ८९ सोसायट्या मतदानास पात्र ठरल्या आहेत. पाटील यांच्या गटातील बहुतांश कार्यकर्ते यापूर्वीच आमदार कल्याणशेट्टी यांच्याकडे दाखल झाल्याने तालुक्याच्या सहकारात त्यांचे एकहाती वर्चस्व आहे.

आमदारकीच्या दुसऱ्या टर्ममध्ये कल्याणशेट्टी यांनी नव्या ४० सोसायट्यांची स्थापना केली आहे. सहकारातील ही मुहूर्तमेढ रोवताना त्यांना डीसीसीचे माजी संचालक सुरेश हसापुरे यांचे सहकार्य लाभले. त्यामुळे माजी मंत्री सिद्धाराम म्हेत्रे आणि शिवानंद पाटील यांच्या गटाचे हसापुरे यांच्यावर विशेष लक्ष असल्याचे दिसते. या पार्श्‍वभूमीवर यंदा दक्षिण सोलापूरचीही निवडणूक चुरशीची ठरू शकते.

भाजपला केलेल्या मदतीतून म्हेत्रेंना संधी

यापूर्वी २०१५ मध्ये जिल्हा बँकेची निवडणूक आणि विधान परिषदेच्या स्थानिक स्वराज्य संस्था मतदारसंघाची निवडणूक जवळपास एकाच वेळी झाली होती. त्यावेळी विधान परिषदेचे महायुतीचे उमेदवार प्रशांत परिचारक यांना विजयासाठी अक्कलकोटचा आशीर्वाद महत्त्वाचा होता. माजी मंत्री सिद्धाराम म्हेत्रे यांना डीसीसीचे संचालकपद हवे होते.

त्यावेळी भाजपसोबत झालेल्या तडजोडीत (स्व.) सिद्रामप्पा पाटील यांचे चिरंजीव शिवानंद पाटील हे सोसायटी मतदारसंघातून, तर म्हेत्रे हे इतर मागासवर्गीय प्रतिनिधी म्हणून जिल्हा बँकेचे संचालक झाले. मात्र, अवघ्या दोन-अडीच वर्षांत संचालक मंडळ बरखास्त झाल्याने या संचालक मंडळाला उल्लेखनीय काम करता आले नाही.