Ajit Pawar : लोकसभेतील पिछाडीचा धसका; अजितदादांच्या आमदाराचा जरांगेंच्या मागणीला पाठिंबा!

Solapur Political News : लोकसभा निवडणुकीत मराठा आरक्षणाच्या आंदोलनामुळे बसलेला फटका पाहून अनेक आमदार-खासदार खडबडून जागे झाले आहेत. त्यातूनच उपमुख्यमंत्री अजित पवार यांच्या राष्ट्रवादी काँग्रेसचे माढ्याचे आमदार बबनराव शिंदे यांनी मनोज जरांगे पाटील यांच्या मागणीला पाठिंबा देणारे पत्रकच थेट जाहीर केले आहे.

मराठा समाजाला इतर मागास प्रवर्गातून (ओबीसी) सगे-सोयरे या शब्दाचा अंतर्भाव करून आरक्षण देण्यात यावे, अशा आशयाचे पाठिंब्याचे पत्र आमदार बबनराव शिंदे यांचे सुपुत्र रणजितसिंह शिंदे यांनी अंतरवाली सराटी येथे जाऊन जरांगे यांना दिले आहे.

सगे सोयरे या शब्दाचा अंतर्भाव करून मराठा समाजाला ओबीसीतून आरक्षण देण्यात यावे, या मागणीसाठी मनोज जरांगे पाटील (Manoj Jarange Patil) हे पुन्हा अंतरवाली सराटीत उपोषणाला बसले आहेत.

त्या उपोषणाला पाठिंबा देण्यासाठी आमदार बबनदादा शिंदे यांनी राज्य सरकारकडे मराठा समाजाला सगेसोयरे या शब्दाचा अंतर्भाव करून ओबीसी प्रवर्गातून आरक्षण देण्याबाबत पाऊल उचलले आहे. अशी मागणी करणारे आमदार बबनराव शिंदे हे सोलापूर जिल्ह्यातील पहिले आमदार आहेत.

मनोज जरांगे पाटील यांना दिलेल्या पाठिंब्याच्या पत्रात आमदार शिंदे यांनी म्हटले आहे की, मराठा समाज हा पूर्वीपासून आरक्षणापासून वंचित राहिलेला आहे, त्यामुळे मराठा समाजातील सर्व तरुण-तरुणींनी प्रत्येक क्षेत्रात अडचणींचा सामना करावा लागत आहे. मराठा समाजाच्या तीव्र भावना लक्षात घेऊन त्यांना न्याय देण्यासाठी सरकारने मराठा समाजास तातडीने आरक्षण देणे आवश्यक आहे

मराठा समाज बांधवांना ओबीसी प्रवर्गातून कुणबी मराठा हे प्रमाणपत्र सगे सोयरे या शब्दांचा अंतर्भाव करून लाभ मिळावा, यासाठी अंतरवाली सराटी येथे उपोषणाला बसलेले मनोज जरांगे पाटील यांच्या उपोषणाला आमचा पाठिंबा आहे. माढा तालुका आणि माढा विधानसभा मतदारसंघाच्या वतीने मी त्यांना जाहीर पाठिंबा देत आहे, असेही बबनदादा शिंदे यांनी प्रसिद्धीस दिलेल्या पत्रकात म्हटले आहे.