Satara News : माजी जिल्हा परिषद सदस्यावर प्राणघातक हल्ला; पुण्यात उपचार सुरू

लिंब : लिंब (ता.सातारा) येथील सातारा पंचायत समितीचे माजी उपसभापती, माजी जिल्हा परिषद सदस्य व आमदार शिवेंद्रसिंहराजे भोसले यांचे समर्थक जितेंद्र सर्जेराव सावंत यांच्यावर रविवारी रात्री प्राणघातक हल्ला झाला आहे. या हल्ल्यात श्री. सावंत गंभीर जखमी झाले असून त्यांच्यावर पुणे येथे उपचार सुरू आहेत. सावंत यांच्यावरील भ्याड हल्ल्याच्या निषेधार्थ लिंब परिसरात बंद ठेवण्यात आला आहे.

जितेंद्र सर्जेराव सावंत यांच्यावर रविवारी रात्री प्राणघातक हल्ला झाला आहे. त्यांच्यावर काही युवकांनी कोयत्याने हल्ला केला. सावंत यांच्यावर मानेवर, चेहऱ्यावर वार झाल्याचे प्राथमिक माहिती आहे. त्यांच्यावर सातारा येथील खाजगी रुग्णालयात उपचार सुरु होते.

परंतू, त्यांची प्रकृती खालवल्यामुळे त्यांना पुढील उपचारासाठी पुणे येथे नेण्यात आले आहे. दरम्यान जितेंद्र सावंत यांच्यावर झालेल्या भ्याड हल्ल्यामुळे लिंब परिसरात बंद ठेवण्यात आला आहे, तर रुग्णालयाबाहेर त्यांच्या समर्थकांनी मोठी गर्दी केली होती.