BJP Minister Jaykumar Gore : अश्लील फोटो प्रकरण, मंत्री गोरेंच्या खंडणीच्या गुन्ह्यात मोठी अपडेट; उपमुख्यमंत्री शिंदेंचा 'सुभेदार' अटकेत

Maharashtra politics update : राज्याचे ग्रामविकास मंत्री जयकुमार गोरे यांच्याकडे एक कोटी रुपयांच्या खंडणीच्या मागणीत, सातारा पोलिसांनी एका महिलेला अटक केली आहे. या महिलेने अश्लील फोटोचे प्रकरण मिटवण्यासाठी गोरे यांच्याकडे तीन कोटी रुपये मागितले होते. त्यातील एक कोटीची रक्कम मंत्री गोरेंकडून स्वीकारताना, या महिलेला पोलिसांनी अटक केली.

आता या प्रकरणात आणखी एक मोठी अपडेट समोर आली आहे. या महिलेमागे आखणी राजकीय पदाधिकारी असल्याचे समोर येत आहे. सातारा पोलिसांनी उपमुख्यमंत्री एकनाथ शिंदे यांच्या शिवसेनेतील उपजिल्हाप्रमुख अनिल सुभेदार यांना अटक केली आहे. या कारवाईमुळे या प्रकरणाचे धागेदोरे खोलवर रुतलेले असल्याचे समोर येत आहे.

राज्याचे ग्रामविकास मंत्री जयकुमार गोरे (Jaykumar Gore) यांच्यावर गंभीर आरोप करणाऱ्या महिलेला सातारा पोलिसांनी आज शुक्रवारी सकाळी अटक केली. अश्लील फोटो पाठवल्याचे प्रकरण मिटवण्यासाठी या महिलेने गोरे यांच्याकडे तीन कोटींची खंडणी मागितली होती. यातील एक कोटी रुपयांची खंडणी घेताना संबंधित महिलेला अटक केली.

महिलेला अटक करण्यापाठोपाठ आता, आणखी एकाला अटक केली. उपमुख्यमंत्री एकनाथ शिंदेंच्या शिवसेना (Shivsena) पक्षाचे उपजिल्हाप्रमुख अनिल सुभेदार याला दहिवडी पोलिसांनी अटक केली. खंडणी प्रकरणात संबंधित महिलेसह अनिल सुभेदार याचा सहभाग असल्याचा आरोप आहे. दहिवडी येथील न्यायालयात अनिल सुभेदार याला पोलिसांनी हजर केले आहे.

दरम्यान, महिलेला देण्यासाठी एक कोटी रुपये मंत्री जयकुमार गोरे यांच्याकडे कोठून आले, असा सवाल आमदार रोहित पवार यांनी केला आहे. खासदार संजय राऊत यांनी या प्रकरणाच्या कारवाईबाबत शंका उपस्थित करत पोलिस प्रशासनाची पोलिसगिरी सुरू आहे का, असा सवाल केला.

खासदार सुप्रिया सुळे यांनी देखील त्या महिलेच्या पिशवीत एक कोटी रुपये कोणी टाकले आहे का? असा सवाल करत कारवाईवर शंका उपस्थित केली आहे. या अश्लील फोटो प्रकरणावरून मंत्री गोरे यांच्या राजीनाम्याची मागणी विरोधकांनी विधिमंडळात लावून धरली होती. मात्र, हे प्रकरण 2019 मध्ये मंत्री गोरे यांची न्यायालयाने मुक्तता केली आहे.