आमदार आवताडे दुसऱ्यांदा दानवेंच्या भेटीला पण 'ग्रीन सिग्नल' काही मिळेना!

मंगळवेढा : पंढरपूर-विजयपूर या प्रलंबित रेल्वेमार्गासाठी भाजपचे (BJP) आमदार समाधान आवताडे (Samadhan Autade) यांचा पाठपुरावा सुरू आहे. यासाठी त्यांनी आठ महिन्यात दुसऱ्यांदा रेल्वे राज्यमंत्री रावसाहेब दानवेंची (Raosaheb Danve) नुकतीच भेट घेतली. परंतु. रेल्वे मंत्रालयाकडून ग्रीन सिग्नल मात्र अजूनही मिळत नसल्याचे चित्र आहे. भाजपच्याच आमदाराला आपल्याच पक्षाच्या केंद्रीय मंत्र्याकडे हेलपाटे मारावे लागत आहेत.

पंढरपूर विधानसभेच्या पोटनिवडणुकीनंतर ही जागा आता भाजपकडे आली आहे. स्थानिक आमदार, खासदार व केंद्रातील सरकार हे भाजपचे असल्याने रेल्वेचा प्रश्न मार्गी लागेल, अशी अपेक्षा होती. यासाठी आमदार आवताडे यांनी 27 जुलै 2021 रोजी दिल्लीत रेल्वेमंत्र्यांची भेट घेऊन हा प्रश्न मार्गी लावण्याची विनंती केली होती. यावर आठ महिन्यांत कोणतीही कार्यवाही झाली नाही. यामुळे पुन्हा आवताडे यांनी रेल्वेमंत्री दानवेंची भेट घेतली. या बैठकीत दानवेंनी लवकरच बैठक घेऊ, असे आश्वासन दिले आहे.

पंढरपूरमध्ये विठ्ठल दर्शनासाठी कर्नाटकातून येणाऱ्या भाविकांची संख्या मोठी आहे, विजयपूर ते पंढरपूर हे रेल्वे मार्गाने जोडल्यास या भागातील भाविकांची संख्या आणखी वाढणे शक्य आहे. भाविकांचा प्रवास सुखकर होण्यासाठी रेल्वे फायदेशीर ठरणार आहे. हीच रेल्वे पंढरपुरातून पुढे लोणंदला जोडल्यास सोलापूर मार्गावरून उत्तर भारतात जाणाऱ्या रेल्वेचे सुमारे 61 किलोमीटरचे अंतर वाचवणार आहे. दिवंगत आमदार भारत भालके यांनी तत्कालीन रेल्वेमंत्री पीयूष गोयल यांनाही याबाबत निवेदन दिले होते. परंतु. या रेल्वे मार्गाचा प्रश्न रखडलेलाच आहे.

राज्यात महाविकास आघाडी सरकारच्या स्थापनेनंतर झालेल्या पहिल्याच पोटनिवडणुकीत पंढरपूरची जागा भाजपने राष्ट्रवादीकडून हिसकावून घेतली. भाजपने महाविकास आघाडी सरकारला त्यावेळी पहिलाच धक्का दिला होता. यामुळे ही पोटनिवडणूक आणि यात विजयी झालेले समाधान आवताडे चर्चेत आले होते. आता याच आवताडेना त्यांच्या मतदारसंघातील मागण्यांसाठी वारंवार पाठपुरावा करावा लागत आहे. आपल्याच केंद्रातील मंत्र्यांकडून त्यांना सहकार्य मिळत नसल्याचे दिसत आहे.