BJP Politics : '1000 किलो मांस वाटलं, त्याला पक्षात घेतलं', भाजप कार्यकर्त्यांचा थेट आत्मदहनाचा प्रयत्न

Pune News : आगामी महापालिका निवडणुकीच्या पार्श्वभूमीवर आज भाजपमध्ये मेगा इनकमिंग पाहायला मिळालं. भाजपने पुण्यातील जवळपास एक डझन नेत्यांना पक्षप्रवेश दिला. या पक्षप्रवेशानंतर आता कुठेतरी कार्यकर्त्यांमध्ये नाराजीचे चित्र पाहायला मिळत असून ती आता उफाळून येताना दिसत आहे.

आगामी पुणे महापालिकेच्या निवडणुकीमध्ये भाजपने 125 नगरसेवक निवडून आणण्याचे उद्दिष्ट ठेवला आहे. त्यामुळे ज्या ठिकाणी भाजपची ताकद कमी आहे त्या ठिकाणी भाजप इतर पक्षातील नेत्यांना प्रवेश देत असल्याचे चित्र पाहायला मिळत आहे. मात्र या पक्षप्रवेशांमुळे कार्यकर्ते आणि त्या ठिकाणच्या स्थानिक नेत्यांमध्ये नाराजी असल्याचे पाहायला मिळत आहे.

अनेक पक्षप्रवेशांना स्थानिक नेत्यांनी विरोध केला होता तरी देखील त्यांचा विरोध डावलून प्रवेश घडून आणण्यात आले असल्याचे सांगितले. मात्र अद्याप पर्यंत भाजपचे कार्यकर्ते बाहेर येऊन याबाबत उघडपणे नाराजी व्यक्त करताना दिसत नव्हते. मात्र आता नाराज भाजप कार्यकर्त्यांनी आंदोलनाचा पवित्रा घेतला असल्याचे पाहायला मिळत आहे.

कसबा विधानसभा मतदारसंघातील एका प्रवेशामुळे स्थानिक कार्यकर्ते नाराज झाले असून त्या विरोधात त्यांनी भाजपच्या पुणे शहर कार्यालयाबाहेर आंदोलन केल्याचं पाहायला मिळालं. यावेळी कसबा विधानसभा मतदारसंघातून झालेला एक प्रवेश मागे घ्यावा अशी मागणी या आंदोलनकर्त्या कार्यकर्त्यांनी केली. तसंच यावेळी या आंदोलनकर्त्या कार्यकर्त्यांनी आपल्या सोबत ज्वलनशील पदार्थ देखील आणले होते. मात्र पोलिसांनी प्रसंगावधान दाखवत ते काढून घेतलं. यावेळी या कार्यकर्त्यांनी आम्ही आत्मदहन करणार होतो असं देखील सांगितलं.

कसबा विधानसभा मतदारसंघातील अमोल देवळेकर यांना भाजपने प्रवेश दिला आहे. स्वातंत्र्य दिन आणि गोकुळ अष्टमी ज्या दिवशी होती. त्या दिवशी राज्य सरकारने म्हणजेच मुख्यमंत्र्यांनी मांसाहार करू नका किंवा मांस विक्रीची दुकाने बंद ठेवा असं आवाहन केलं होतं.

मात्र मुख्यमंत्र्यांची आणि भाजपची अवहेलना करण्यासाठी अमोल देवळेकर या व्यक्तीने 1000 किलो मासाचं वाटप केलं होतं. त्या व्यक्तीला पक्षप्रवेश देण्यात आला आहे. कदाचित आमच्या नेत्यांना या व्यक्तीची पार्श्वभूमी माहीत नसेल त्यामुळे हा प्रवेश देण्यात आला आहे. मात्र देवळेकर हे विद्रोही विचारांचे असून त्यांची विचारसरणी भाजपशी मिळते जुळती नाही त्यामुळे आता हा प्रवेश रद्द करण्यात यावा अशी मागणी या कार्यकर्त्यांनी केला आहे.

FAQs :

1. पुण्यात भाजपमध्ये काय घडलं?
➡️ भाजपमध्ये जवळपास एक डझन नेत्यांचे पक्षप्रवेश झाले, ज्यावरून कार्यकर्त्यांमध्ये नाराजी पसरली.

2. कोणत्या मतदारसंघातील कार्यकर्ते नाराज झाले?
➡️ कसबा विधानसभा मतदारसंघातील कार्यकर्ते.

3. आंदोलन कुठे करण्यात आलं?
➡️ भाजपच्या पुणे शहर कार्यालयाबाहेर.

4. पोलिसांनी काय कारवाई केली?
➡️ आंदोलनकर्त्यांकडील ज्वलनशील पदार्थ जप्त करून परिस्थिती नियंत्रणात आणली.

5. या घटनेचा निवडणुकीवर परिणाम होईल का?
➡️ पक्षांतर्गत असंतोष वाढल्यास निवडणूक रणनीतीवर परिणाम होऊ शकतो.