Shivsena Politics : ठाकरेंचा पैलवान शिंदेंच्या पंगतीत; उदय सामंतांनी आणखी एक कुस्ती मारली!

Sangli News, 26 Apr : डबल महाराष्ट्र केसरी, पैलवान चंद्रहार पाटील यांचा शिवसेना पक्षात प्रवेश जवळपास निश्चित झाला आहे. नुकतीच त्यांनी कुडाळ येथे उपमुख्यमंत्री एकनाथ शिंदे यांची भेट घेत चर्चा केली. काहीच दिवसांपूर्वी त्यांनी शिवसेना उद्धव बाळासाहेब ठाकरे पक्षाची साथ सोडणार असल्याचे सांगितले होते.

उदय सामंत यांचा पुढाकार :

चंद्रहार पाटील यांनी एकनाथ शिंदेंची (Eknath Shinde) भेट घेतली. यावेळी दोघांनी एकत्र जेवण देखील केलं. मंत्री उदय सामंत यांच्या माध्यमातून ही भेट झाल्याचे सांगितले जाते. त्यामुळे सामंत यांनी आणखी एका नेत्याला पक्षात आणून पक्षवाढीला हातभार लावला आहे. यापूर्वी पुण्यात माजी आमदार रवींद्र धंगेकर यांचाही शिवसेना प्रवेश सामंत यांच्याच माध्यमातून झाला होता.

सांगली मतदारसंघातील निवडणूक गाजली :

2024 च्या लोकसभा निवडणुकीत सांगली लोकसभा मतदारसंघ राज्यभर चर्चेत राहिला. काँग्रेसकडे असलेला हा मतदारसंघात शिवसेना उद्धव बाळासाहेब ठाकरे पक्षाने आपल्याकडे घेत इथे चंद्रहार पाटील यांना उमेदवारीही जाहीर केली होती. त्यामुळे राज्यात महाविकाह आघाडी असतानाही सांगलीत मात्र मित्र पक्षांमध्ये धुसफूस पाहायला मिळाली होती.

काँग्रेसच्या बड्या नेत्यांनी उद्धव ठाकरे आणि संजय राऊत यांची भेट घेतली. तरी देखील ही जागा ठाकरेंनी पैलवान पाटील यांनाच दिली. त्यानंतरचा निकाल सर्वांना माहिती आहे. मात्र, निकालानंतरही पैलवान पाटील हे सतत खासदार संजय राऊत यांच्यासोबत असल्याचं दिसून आलं.

मात्र, राऊतांबरोबर सावलीप्रमाणे राहणारे हेच पाटील आता शिंदेंच्या शिवसेनेत जाणार असल्याचं निश्चित झालं आहे. दरम्यान या चर्चांवर चंद्रहार पाटलांनी उद्धवसाहेबांनी मला खूप साथ दिली, मोठी ताकद दिली ते मान्यच करावे लागेल. पण भविष्याचा विचार केल्यास क्रीडा आणि सामाजिक क्षेत्रासाठी काम करण्यासाठी सरकारची गरज लागते. त्यामुळे सत्तेत जावं लागेल, असं स्पष्ट केलं आहे.