CM Fadnavis on Gokul : CM फडणवीसांचा आदेश धडकताच गोकुळमध्ये मोठ्या घडामोडी : वेगवेगळे दंड थोपटलेले भाजप-जनसुराज्य शक्ती एकत्र ठराव दाखल करणार

कोल्हापूर जिल्ह्यात सध्या गोकुळच्या राजकारणामुळे चर्चेत आला आहे. निवडणुकीच्या पार्श्वभूमीवर ठराव दाखल करण्याची प्रक्रिया सुरू असताना वैद्यकीय शिक्षण मंत्री हसन मुश्रीफ यांनी राष्ट्रवादी काँग्रेसकडून शक्ती प्रदर्शन करत ठराव दाखल केले. त्यामुळे आता भाजप देखील आपली गोकुळ मधील ताकद दाखवणार आहे.

त्यांच्यासोबत जनसुराज्य शक्ती देखील आपली ताकद दाखवणार आहे. सोमवार 29 जून रोजी मुख्यमंत्री देवेंद्र फडणवीस यांच्या आदेशानुसार भाजप आणि जनसुराज्य शक्ती एकत्र ठराव दाखल करणार आहे. गोकुळ दूध संघाच्या मागील निवडणुकीत भाजपचा सहयोगी पक्ष असलेला जनसुराज्य शक्ती हा आमदार सतेज पाटील आणि तत्कालीन ग्रामविकास मंत्री हसन मुश्रीफ यांच्या नेतृत्वाखाली लढला.

त्यावेळी आमदार डॉ. विनय कोरे हे भाजप नेत्यांच्या विरोधात मैदानात होते. मात्र सध्याची राजकीय समीकरणे पाहिली तर भाजप आणि जनसुराज्य शक्ती महायुती म्हणून एकत्र लढणार आहे. महायुतीतील राष्ट्रवादी काँग्रेसने स्वतंत्रपणे ठराव दाखल केले आहेत. तर शिवसेना ही स्वतंत्रपणे ठराव दाखल करणार आहेत.

मात्र मुख्यमंत्री देवेंद्र फडणवीस यांच्या आदेशानुसार भाजप आणि जनसुराज्य शक्तीला एकत्र सामोरे जावे लागणार आहे. येत्या 29 जूनला रेसिडेन्सी क्लब येथून भाजप आणि जनसुराज्य शक्ती एकत्र शक्ती प्रदर्शन करत ठराव दाखल करणार आहेत. त्यासंदर्भातील सूचना वरिष्ठ स्तरावरून आल्याची माहिती समोर येत आहे.

दुग्धनिबंधकांचे आदेश

ज्या व्यक्तीच्या नावावर ठराव आहे त्यांनी स्वतंत्रपणे ठराव दाखल करावा अशी मागणी ठेवून देखील मंत्री हसन मुश्रीफ यांनी शक्ती प्रदर्शन करत ठराव दाखल केले. यावेळी गोंधळ निर्माण झाल्याने अनेक अडचणींना सामोरे जावे लागले. त्यामुळे दुग्ध निबंधक विभागाकडून गर्दीने ठराव दाखल न करता ते 500 च्या संख्येने दाखल करावेत. प्रशासनाला सहकार्य करावे अशी विनंती सर्वच पक्षीय नेत्यांना केली आहे.