Siddharam Mhetre : एकनाथ शिंदेंचा आदेश अन्‌ पालकमंत्री गोरेंचा शब्द : सिद्धाराम म्हेत्रेंनी सांगितली महायुतीची स्ट्रॅटेजी!

Solapur, 18 June : विधान परिषद निवडणुकीच्या तोंडावर भारतीय जनता पक्षावर सोलापुरातील शिवसेना नाराज होती. विशेषतः अक्कलकोट तालुक्यातील कट्टर राजकीय विरोधक असलेले माजी मंत्री सिद्धाराम म्हेत्रे आणि आमदार सचिन कल्याणशेट्टी महायुतीत असूनही त्यांची तोंडं विरोध दिशेला होती. मात्र, उपमुख्यमंत्री एकनाथ शिंदे यांचा आदेश आणि पालकमंत्री गोरे यांनी शब्द दिला, त्यामुळे अक्कलकोट तालुक्यात महायुती वन साईड आहे, अशी प्रतिक्रिया सिद्धाराम म्हेत्रे यांनी दिली.

म्हेत्रे हे आपले सर्व नगरसेवक आणि जिल्हा परिषद सदस्यांना घेऊन एकत्रिपणे मतदानाला आले होते. त्या वेळी ते माध्यमांशी बोलत होते. अक्कलकोट तालुक्यात म्हेत्रे आणि कल्याणशेट्टी यांच्यात राजकीय वर्चस्वाची लढाई आहे, त्यामुळे विधान परिषद निवडणुकीत काय होणार, अशी चर्चा होती. मात्र, म्हेत्रे यांनी उपमुख्यमंत्री शिंदे यांच्या आदेशानुसार महायुतीचे काम केल्याचे स्पष्ट केले.

ते म्हणाले, विधान परिषदेचं चित्र काय असणार आहे, हे आमच्यापेक्षा तुम्हाला चांगलं माहिती आहे. शिवसेनेत थोडी नाराजीची भावना होती. पण, पालकमंत्री जयकुमार गोरे यांनी सर्वांना बोलावून बैठक घेतली. तसेच वरच्या लेव्हलही ठरलं.

भाजपचा जो कोटा असेल, तसेच शिवसेना, अजितदादांच्या राष्ट्रवादी यांच्या काही तक्रार असणार नाहीत. पुढची तीन ते साडेतीन वर्षे महायुतीत सगळं व्यवस्थित चालेल. कुणाच्याही तक्रारी येऊ देणार नाही, असा शब्द पालकमंत्री गोरे यांनी दिला आहे, असेही माजी मंत्री म्हेत्रे यांनी स्पष्ट केले.

सिद्धाराम म्हेत्रे म्हणाले, अक्कलकोट तालुक्यात सर्व महायुतीच्या बाजूने वनसाईड आहे. दुधनीत आमचे २३ पैकी २३ नगरसेवक आहेत. जिल्हा परिषद त्यांचे (आमदार सचिन कल्याणशेट्टी) आहेत, आमचेही आहेत. तालुक्यात महायुतीच्या बाहेर कोणीही नाहीत. मैंदर्गी, अक्कलकोट, दुधनीत आम्ही सर्व एकत्रच आहेत.

आपल्याला महायुतीचा धर्म तोडायचा नाही. युतीमध्ये धर्म तोडून काय उपयोग होणार नाही. कशाला उगी हे करता. आपण आता देशात, राज्याच्या सरकारमध्ये मिळून काम करतो. स्थानिक स्वराज्य संस्थांच्या निवडणुकीत गडबड करून मिठाचा खडा टाकण्यासारखं होणार आहे, त्यामुळे तसं करू नका, सगळेजण व्यवस्थित काम करा, असा आदेश उपमुख्यमंत्री एकनाथ शिंदे यांनी दिला आहे, असे माजी मंत्री म्हेत्रे यांनी स्पष्ट केले.