Gokul Dairy : डोंगळेंनी चाली रचल्या, महाडिकांनी हवा दिली...'बंटी पाटलांकडून' हिसकावले 'पॉलिटिकल' पॉवर हाऊस!

कोल्हापूर जिल्हा दूध उत्पादक संघ अर्थात गोकुळमधील सत्तांतर हा मागच्या चार दिवसांपासून राज्याच्या राजकारणात गाजणारा विषय बनला आहे. गटातटाच्या राजकारणात मग्न असणारं कोल्हापूर पहिल्यांदाच महायुती विरुद्ध महाविकास आघाडी असे बनले होते. या वादात अखेर महायुतीचा विजय झाला आणि राष्ट्रवादी काँग्रेसचे नेते, मंत्री हसन मुश्रीफ यांचे सुपुत्र नविद मुश्रीफ गोकुळ दूध संघाचे नवे अध्यक्ष बनले आहेत.

पण शांत चालेल्या गोकुळमध्ये महायुती विरुद्ध महाविकास आघाडी या वादाला सुरुवात कशी झाली?

जिल्ह्याच्या राजकारणात 'गोकुळचे' अनन्यसाधारण महत्त्व आहे. वार्षिक 4 हजार कोटी रुपयांची आर्थिक उलाढाल ही गोकुळची खरी ताकद आहे. पण त्याचबरोबर दूध संकलन आणि दूध पुरवठा यामाध्यमातून गावखेड्यात पसरलेली यंत्रणा गोकुळच्या ताब्यात आहे. त्यामुळे गोकुळवरील वर्चस्वासाठी सर्वच नेत्यांमध्ये टोकाची लढाई असते. 2021 मध्ये महादेवराव महाडिक यांच्या तब्बल 3 दशकांच्या वर्षांच्या सत्तेला सुरुंग लावत हसन मुश्रीफ आणि काँग्रेस नेते आणि आमदार सतेज पाटील यांनी गोकुळ आपल्या ताब्यात घेतले.

यामध्ये महत्त्वाचा वाटा होता तो विश्वास पाटील आणि अरुण डोंगळे यांचा. त्यांनी त्यांचे ठरावधारक मुश्रीफ आणि पाटील यांच्यामागे उभे केले. सत्तांतर झाल्यानंतर सुरुवातीला अध्यक्षपदासाठी अरुण डोंगळे आग्रही होते. पण ज्येष्ठतेच्या मुद्दयावर विश्वास पाटील यांना सुरुवातीचे 2 वर्षे अध्यक्षपद दिले गेले. त्यानंतर पुढची 2 वर्षे डोंगळे यांना दिले. तर उर्वरित एका वर्षाच्या अध्यक्षपदाचा निर्णय त्यावेळी बैठकीत घेण्यात येईल असे ठरले.

मागच्या 3 वर्षांत राज्याच्या राजकारणात कमालीचे परिवर्तन झाले. त्याचा थेट परिणाम जवळपास प्रत्येक जिल्ह्याच्या राजकारणावर झाला. या सत्तांतराची झळ कोल्हापूरलाही बसली. महाडिक कुटुंबीय भाजपवासी झाले, मुश्रीफ महायुतीत गेले. तर सतेज पाटील महाविकास आघाडीतच राहिले. गोकुळचे अध्यक्ष असलेले अरुण डोंगळे शिवसेनेकडे झुकले. आता उर्वरित एका वर्षाचा अध्यक्ष कोण होणार याची चर्चा होऊ लागताच डोंगळे यांनी मुख्यमंत्री देवेंद्र फडणवीस व उपमुख्यमंत्री एकनाथ शिंदे यांची भेट घेतली.

या भेटीनंतर गोकुळचा पुढचा अध्यक्ष महायुतीचा होणार असेल तरच आपण राजीनामा देऊ, असे म्हणत बंडाची भूमिका घेतली. त्यांच्या या बंडानंतर गोकुळमध्ये एकच खळबळ उडाली. सुरुवातीला मुश्रीफ आणि पाटीलही अस्वस्थ झाले. पण अवघ्या एका दिवसात दोघांनीही 18 संचालकांची एकजूट केली अन् डोंगळे यांना एकाकी पाडले. त्यानंतरही डोंगळे यांनी 'वेट अँड वॉच'ची भूमिका घेत नेत्यांकडून अध्यक्षपदासाठी कोणते नाव येते याची वाट पाहिली.

या दरम्यानच्या काळात मुश्रीफ यांनी फडणवीस आणि शिंदे यांची समजूत काढून त्यांना गोकुळमध्ये लक्ष न घालण्याची विनंती केली. पण सतेज पाटील यांचे समर्थक असलेल्या शशिकांत पाटील चुयेकर यांचे नाव पुढे येताच डोंगळे यांनी चाली रचल्या. त्यांच्या चालीला धनंजय महाडिक यांनी पडद्याआडून साथ दिली. गोकुळच्या अध्यक्षपदावर काँग्रेसधार्जिणा चेहरा नकोच अशी भूमिका महाडिक यांनी घेतली आणि राज्यातील नेत्यांना पुन्हा हस्तक्षेप करण्याची विनंती केली.

गोकुळची ताकद स्थानिक स्वराज्य संस्थांच्या निवडणुकीत महाविकास आघाडीच्या आणि काँग्रेसच्या मागे उभी राहिली तर महायुतीला अवघड जाईल. आपल्या संस्थांमध्ये आपले बहुमत असूनही आपलीच अडचण होईल. त्यामुळे अध्यक्ष कोणालाही करा, पण महायुतीचा करा, म्हणजे पुढच्या निवडणुकीत आपल्याला सोपे जाईल. अन्यथा या निवडणुकीच्या निकालाबाबत भाजपचे नेते म्हणून आम्हाला विचारू नका, अशी थेट भूमिका धनंजय महाडिक यांनी महायुतीच्या नेत्यांकडे मांडल्याचे समजते.

अखेर शेवटच्या 2 दिवसांत मुंबईतून हालचाली वाढल्या. अध्यक्षपदाचा उमेदवार बदलण्यासाठी महायुतीच्या नेत्यांनी मुश्रीफ, कोरे, आबिटकर यांच्यावर दबाव आणला. यानंतर जिल्ह्यातील नेत्यांची मुंबईत बैठक झाली आणि यातच उमेदवार बदलाचा निर्णय झाला. मुश्रीफ गुरुवारी संध्याकाळीच कोल्हापूरमध्ये दाखल झाले. इथे त्यांनी सतेज पाटील यांच्याशी पुन्हा सविस्तर चर्चा केली. आपल्याच आघाडीच्या संचालकालाच अध्यक्ष करायचे, अशी भूमिका घेत सर्व संमतीचा उमेदवार म्हणून नविद मुश्रीफ यांचे नाव पुढे आले.

आता नविद मुश्रीफ हे अध्यक्षपदी विराजमान झाले आहेत. हा बंटी पाटील यांना एक प्रकारे धक्काही आहे आणि दिलासाही आहे. कारण नविद मुश्रीफ हे पाटील आणि मुश्रीफ यांच्या पॅनेलकडून निवडून आले आहेत. मात्र राज्यातील सत्तेत मुश्रीफ महायुतीत आहेत. त्यामुळे अध्यक्षपद आपल्या पॅनेलकडे आहे एवढाच काय तो पाटील यांना दिलासा आहे. तर अध्यक्षपदी राष्ट्रवादी काँग्रेसचा नेता आहे, आगामी काळात महायुती म्हणून समीकरणं मांडली जाणार आहेत. त्यामुळे पाटील यांच्या हातातून जिल्ह्याचे पॉलिटीकल पॉवर हाऊस निसटले आहे हे नक्की.