Gokul Dairy Politics : गोकुळमध्ये महायुतीला ग्रहण? चंद्रकांतदादांच्या बैठकीत ठरलेला फॉर्म्युला भाजपला अमान्य; जागावाटपाचा तिढा मुख्यमंत्र्यांच्या कोर्टात

Gokul Dairy Politics latest news : गोकुळ दूध संघाच्या निवडणुकीच्या पार्श्वभूमीवर महायुतीमधील अंतर्गत संघर्ष पुन्हा एकदा उफाळून आला आहे. संस्था पात्र-अपात्रतेच्या मुद्द्यावरून निर्माण झालेला वाद काहीसा शांत झाल्यानंतर आता जागावाटपाच्या फॉर्म्युल्यावरून भाजप आणि राष्ट्रवादी काँग्रेसमध्ये ठिणगी पडली आहे. उच्च व तंत्र शिक्षण मंत्री चंद्रकांत पाटील यांच्या बैठकीत ठरावांच्या संख्येच्या आधारे जागावाटप करण्याचे सूत्र निश्चित झाल्याचे सांगितले जात असताना, भाजपमधील काही नेत्यांनी या फॉर्म्युल्यालाच विरोध केल्याने गोकुळच्या राजकारणात पुन्हा खळबळ उडाली आहे.

महायुतीतील प्रत्येक घटकाला सन्मानजनक जागा मिळाव्यात, अशी भाजपची भूमिका असल्याचे सांगितले जात आहे. तर ज्यांच्याकडे अधिक ठराव, त्यांना अधिक जागा, या सूत्रावर राष्ट्रवादी काँग्रेस ठाम असल्याचे समजते. त्यामुळे जागावाटपाचा तिढा आता थेट मुख्यमंत्री देवेंद्र फडणवीस यांच्या पातळीवर गेल्याची चर्चा आहे.

शक्तिप्रदर्शनात ठरावांचा आकडा फुगला?

गोकुळ निवडणुकीच्या निमित्ताने महायुतीतील सर्वच घटकांनी मोठ्या प्रमाणात शक्तिप्रदर्शन करत ठराव दाखल केले आहेत. वैद्यकीय शिक्षण मंत्री हसन मुश्रीफ यांनी राष्ट्रवादी काँग्रेसच्या वतीने तब्बल १,९७१ ठराव दाखल केल्याचा दावा केला आहे.

भाजपकडून १,४३१, शिवसेनेकडून १,५१४, तर जनसुराज्यकडून ५४७ ठराव असल्याचा दावा करण्यात आला आहे. दुसरीकडे काँग्रेसकडे १,८५१ ठराव असल्याचे सांगितले जात आहे.

मात्र प्रत्यक्षात गोकुळकडे ५,४३९ ठराव दाखल झाले आहेत. त्यापैकी ५६ ठराव दुबार असल्याची माहिती आहे. त्यामुळे कोणत्या पक्षाकडे नेमके किती वैध आणि स्वतंत्र ठराव आहेत, याचे अंतिम चित्र अद्याप स्पष्ट झालेले नाही.

तालुकानिहाय ठरावांचा आकडा काय?

दाखल झालेल्या ठरावांमध्ये करवीर ८६७, भुदरगड ५९५, राधानगरी ७०३, कागल ६२१, पन्हाळा ५१५, गगनबावडा १३२, शाहूवाडी ४४५, शिरोळ २७०, चंदगड ४२४, आजरा ३०५, गडहिंग्लज ४०१ आणि हातकणंगले १६१ ठराव आहेत.

दरम्यान, ३१ संस्थांनी ठराव दाखल केले नसल्याचे सांगितले जात आहे. ठरावांच्या छाननीनंतर आणि त्यासंदर्भातील न्यायालयीन लढाईनंतर गोकुळच्या अंतिम मतदार यादीत जवळपास ५,४२३ दूध संस्थांना मतदानाचा अधिकार मिळाला आहे.

एकाच संस्थेने दोन्हीकडे ठराव दिल्याची चर्चा

ठराव दाखल करताना अनेक संस्थांनी कोणत्याही नेत्याला नाराज न करण्याची भूमिका घेतल्याचे सांगितले जाते. त्यामुळे काही संस्थांनी दोन वेगवेगळ्या राजकीय गटांकडे ठराव दिल्याचे प्रकार झाल्याची चर्चा आहे.

यामुळे सध्या केवळ ठरावांची संख्या मोजून कोणत्या पक्षाचे संख्याबळ किती, याचा अंतिम निष्कर्ष काढणे अवघड आहे. याच मुद्द्यावरून भाजपच्या काही नेत्यांनी ठरावांच्या संख्येवर आधारित जागावाटपाच्या फॉर्म्युल्याला विरोध केल्याचे समजते.

भाजपला ‘मोठ्या भावाचा’ वाटा हवा?

महायुती म्हणून गोकुळची निवडणूक लढवण्याची तयारी सुरू असली, तरी भाजपच्या नेत्यांकडून वेगळी भूमिका मांडली जात आहे. राज्याच्या राजकारणात भाजप मोठा भाऊ असल्याने गोकुळमध्येही भाजपला महत्त्वाचे आणि सन्मानजनक प्रतिनिधित्व मिळावे, अशी अपेक्षा असल्याचे सांगितले जाते.

दुसरीकडे राष्ट्रवादी काँग्रेसकडून मात्र ठरावांच्या संख्येच्या आधारे जागावाटप करण्याची भूमिका घेतली जात आहे. त्यामुळे एकीकडे ‘ठराव किती?’ हा राष्ट्रवादीचा मुद्दा आहे, तर दुसरीकडे ‘महायुतीतील घटकांना सन्मानजनक वाटा’ हा भाजपचा आग्रह असल्याचे चित्र आहे.

मुश्रीफ म्हणतात राष्ट्रवादी मोठा भाऊ

हसन मुश्रीफ यांनी गोकुळमध्ये राष्ट्रवादी काँग्रेसकडे सर्वाधिक ठराव असल्याचा दावा करत राष्ट्रवादीच मोठा भाऊ ठरणार असल्याची भूमिका घेतली आहे. मात्र भाजपच्या काही नेत्यांनी मुख्यमंत्री फडणवीस यांच्यासमोर राष्ट्रवादीचे ठराव अधिक कसे? तसेच अनेक संस्थांनी दोन्ही बाजूंना ठराव दिल्याचे मुद्दे मांडल्याचे समजते.

त्यामुळे महायुतीच्या पातळीवर एकत्रित जागावाटप करण्याच्या हालचाली भाजपच्या गोटातून सुरू झाल्या आहेत. या फॉर्म्युल्याला हसन मुश्रीफ यांचा विरोध असल्याचे सांगितले जात आहे. परिणामी प्राथमिक टप्प्यातील जिल्हास्तरीय जागावाटपाची बैठक फिस्कटल्याची माहिती आहे.

राष्ट्रवादीकडून १०, भाजपकडून ११ जागांचा दावा

दरम्यान, गोकुळच्या उमेदवारी अर्ज भरण्याच्या प्रक्रियेला सुरुवात झाली आहे. पहिल्याच दिवशी गोकुळचे माजी अध्यक्ष नवीद मुश्रीफ यांच्यासह बाळासाहेब खाडे यांनी महायुतीच्या माध्यमातून अर्ज दाखल केले.

जागावाटपाबाबत राष्ट्रवादी काँग्रेसकडून १० जागांवर दावा करण्यात आला आहे. तर भाजप आणि जनसुराज्यने मिळून ११ जागांचा दावा केल्याचे सांगितले जात आहे. मात्र भाजपच्या या प्रस्तावाला विरोध होत असल्याचे चित्र आहे.

भाजपला सहा-सात जागा देण्याचा प्रस्ताव?

सूत्रांच्या माहितीनुसार, हसन मुश्रीफ हे भाजपला सहा-सात जागा देण्याच्या भूमिकेत असल्याचे सांगितले जाते. मात्र भाजपला हा फॉर्म्युला मान्य नसल्याचे दिसत आहे. महायुतीतील प्रत्येक पक्षाला त्यांच्या राजकीय ताकदीच्या प्रमाणात आणि सन्मानजनक जागा मिळाव्यात, असा आग्रह भाजपकडून धरला जात असल्याची चर्चा आहे. त्यामुळे गोकुळमधील संस्था पात्र-अपात्रतेचा वाद संपल्यानंतर आता जागावाटपाच्या मुद्द्यावर महायुतीमध्येच नवा संघर्ष उभा राहिला आहे.

गोकुळच्या निवडणुकीवर परिणाम होणार?

गोकुळमध्ये महायुती एकत्रितपणे निवडणुकीला सामोरे जाणार असल्याचे चित्र असले, तरी जागावाटपावरून निर्माण झालेला तिढा कायम राहिल्यास त्याचा परिणाम निवडणुकीच्या पुढील समीकरणांवर होण्याची शक्यता आहे.

ठरावांच्या आकड्याचे गणित, भाजपचा ‘मोठ्या भावा’चा दावा आणि राष्ट्रवादीचा संख्याबळावर आधारित जागावाटपाचा आग्रह यामध्ये तोडगा कसा निघतो, हे महत्त्वाचे ठरणार आहे. त्यामुळे गोकुळमध्ये पुन्हा एकदा महायुतीतील अंतर्गत ठिणगी पेटली असून, जागावाटपाचा हा तिढा आता नेमका कोण सोडवणार, याकडे कोल्हापूरच्या राजकीय वर्तुळाचे लक्ष लागले आहे.