Gokul Dairy Scam : गोकुळचा पैसा उधळला कोणी? जाजम व घड्याळ वाटपाचा मास्टरमाइंड कोण? कथित घोटाळ्यावरून सभासदांची न्यायलयात धाव

Kolhapur News, 22 Aug : दिवस-रात्र ऊन पावसात काबाड कष्ट करून दूध उत्पादक शेतकऱ्यांनी गोकुळ दूध संघाचा डोलारा उभा केला. त्यांच्या जीवावरच गोकुळ दूध संघाची प्रतिमा राज्यभर नव्हे तर देशभर तयार होत आहे.

मात्र, दूध संघावर आणि संचालक मंडळावर होत असलेल्या आरोपामुळे गोकुळ दूध संघाची तितकीच बदनामी राज्यभरात होत आहे. लेखापरीक्षणावर अद्याप कारवाई झालीच नाही. आता गोकुळ दूध संघातील जाजम आणि घड्याळ खरेदीचा कथित घोटाळा समोर येत आहे.

निविदा न काढता तीन कोटी 74 लाखाचे साहित्य वाटप केले आहे. त्यामुळे महायुतीच्या सरकारमुळे गोकुळमधील विरोधकांचा आवाज शांत झाला असला तरी सर्वसामान्य दूध उत्पादक आता जाब विचारण्यासाठी सज्ज झाला आहे. दरवर्षी गोकुळच्या सर्वसाधारण सभेत केवळ चिवडा आणि लाडू साठी उपस्थित राहिलेला सभासदांनी आता थेट कोर्टाची पायरी चढली आहे. शिवाय ठाकरेंची शिवसेना देखील या मुद्द्यावरून आक्रमक झाली आहे.

कोल्हापूर जिल्हा दूध उत्पादक संघाच्या अध्यक्षपदाच्या निवडीवरून राज्यातील वातावरण चांगलेच ढवळून निघाले. मुख्यमंत्री देवेंद्र फडणवीस उपमुख्यमंत्री एकनाथ शिंदे यांच्या हस्तक्षेपामुळे गोकुळचे राजकारण राज्यस्तरावर पोहोचले. गेल्या पंचवीस वर्षाची महाडिक गटाची सत्ता उलथवून टाकल्यानंतर मंत्री हसन मुश्रीफ आणि काँग्रेस नेते आमदार सतेज पाटील यांच्या गटाची सत्ता गोकुळ दूध संघावर आली.

पुढील वर्षी गोकुळची निवडणूक आहे. अशातच महायुतीचं सरकार आल्यानंतर गोकुळच्या दूध संघावर महायुतीचाच अध्यक्ष व्हावा यासाठी अनेकांनी बंड केले. मात्र हे बंड यशस्वी झाल्यानंतर गोकुळ मधील विरोधकांकडून उपस्थित केले जाणारे प्रश्न जैसे थे राहिले. त्यामुळे लाखो दूध उत्पादक शेतकऱ्यांच्या मालकीचा असलेला ह्या गोकुळ दूध संघ काही नेत्यांसाठी मलिदा आहे. हे वारंवार होत असलेल्या आरोपामुळे शंका उपस्थित होत आहे.

9 सप्टेंबर रोजी शेवटची वार्षिक सभा आहे. अशातच महायुतीमुळे विरोधक संचालकांचा आवाज थंड झाल्याने आता दूध उत्पादक शेतकऱ्यांकडूनच सत्याधार्‍यांवर वचक ठेवण्यासाठी धडपड सुरू केली आहे. गोकुळमधील काही जणांनी केलेल्या गैरकारभाराच्या विरोधात अद्याप कारवाई का नाही झाली?

लेखापरीक्षणातील झालेल्या चुकांमुळे आणि त्याबरोबर संबंधितांवर कारवाई का झाली नाही? त्याचा जाब विचारण्यासाठी दूध उत्पादक आणि संस्थाचालकाने थेट न्यायालयाची पायरी चढली आहे. दोषीवर कारवाईसाठी दूध उत्पादक शेतकरीच पुढे आल्याने आता गोकुळचे राजकारण चांगले तापण्याची शक्यता आहे.

गोकुळच्या कारभारात अनागोंदी आहे. लेखा परीक्षणात त्रुटी आहे. याच त्रुटींचे चाचणी लेखापरीक्षण व्हावे, अशी मागणी यापूर्वी संचालिका शौमिका महाडिक यांनी या मंडळाच्या विशेष कार्य अधिकाऱ्यांकडे केली होती. मात्र हे लेखापरीक्षण होऊ नये यासाठी गोकुळ दूध संघाच्या वतीने उच्च न्यायालयात त्याला आव्हान दिले होते.

मात्र गोकुळ सत्ताधाऱ्यांची ही मागणी न्यायालयाने पेट्रोल लावल्यानंतर लेखापरीक्षणाचा मार्ग मोकळा झाला होता. त्यावेळी सौ. महाडिक यांनी हे प्रश्‍न का उपस्थित केले नाहीत, असा उलट प्रश्‍न तत्कालीन अध्यक्ष विश्‍वास पाटील यांनी केला होता. मात्र महायुती सरकार आल्यानंतर गोकुळ मधील अध्यक्ष अरुण डोंगळे यांची निवड करण्यात आली. नंतर या सर्व प्रक्रियेला फुल स्टॉप मिळाला. मात्र यावर पुढे कारवाई कोणावरच झाली नाही.

लेखा परीक्षणात बाब उघड

लेखा परीक्षणातील काही त्रुटी प्रशासकीय अधिकाऱ्यांच्या लक्षात आल्या. शिवाय गोकुळच्या बाजूनेही काही गोष्टी लक्षात आल्यानंतर वस्तुनिष्ठ अहवाल राज्य सरकारकडे सुपूर्द करण्यात आला. तर त्यामधील काही गोष्टींवर आक्षेप घेण्यात आला. सात लाख सहा हजार दोनशे रुपये खासगी व्यक्तींना डोनेशन दिले आहे.

याबाबत स्पष्टोक्ती नाही. कॅन दुरुस्तीची निविदा न काढता वाढीव दराने पुन्हा त्याच ठेकेदाराला काम दिले. पशु खाद्याच्या कागल आणि गडमुडशिंगी येथील कारखान्यात कपडे धुण्याची निविदा न काढता काम दिले. मुंबई येथील दूध विक्रेत्यांच्या केबिन सजावटीसाठी प्रत्येकी 32 हजार रुपये दिले. दूध संघाच्या कर्मचारी पतसंस्थेला 5 कोटींचे खेळते भांडवल दिले आहे.