Gokul Milk : कोल्हापूर जिल्हा सहकारी दूध उत्पादक संघ अर्थात गोकुळशी संलग्न १२00 हून अधिक प्राथमिक दूध संस्थांची चौकशी करावी अशी मागणी करणारे, मंत्री हसन मुश्रीफ यांच्यावर सातत्याने टीका करणारे गर्जना संघटनेचे प्रमुख प्रकाश बेलवाडे यांच्यावर हल्ल्याचा प्रयत्न झाल्याची घटना घडली आहे. कागल चेकपोस्ट नाका येथे हा प्रकार घडला असून या घटनेत वैभव यादव हेही जखमी झाले आहेत.
या घटनेचा एक व्हिडिओ सोशल मीडियावर व्हायरल झाला आहे. व्हिडिओमध्ये एक व्यक्ती चप्पल उगारत बेलवाडे यांच्या दिशेने धावताना दिसत आहे. विशेष म्हणजे यावेळी पोलीसही उपस्थित असल्याचे व्हिडिओमध्ये दिसून येत आहे.
प्रकाश बेलवाडे यांनी गेल्या काही दिवसांपासून गोकुळ दूध संघाच्या कारभारावर जोरदार टीका सुरू केली होती. विशेषतः गोकुळशी संलग्न सुमारे १२०० प्राथमिक दूध संस्थांच्या अवसायन प्रक्रियेची चौकशी करण्याची मागणी त्यांनी लावून धरली होती. यासाठी त्यांनी न्यायालयात धाव घेतली असून सध्या या प्रकरणाची उच्च न्यायालयात सुनावणी सुरू आहे.
यासोबतच गोकुळवर प्रशासक नेमण्याची मागणीही बेलवाडे सातत्याने करत आहेत. या पार्श्वभूमीवर त्यांनी मंत्री हसन मुश्रीफ आणि गोकुळच्या संचालक मंडळावर टीकास्त्र सोडले होते. त्यानंतर आता त्यांच्यावर हल्ल्याचा प्रयत्न झाल्याने कोल्हापूरच्या राजकारणात खळबळ उडाली आहे.
१२०० संस्थांच्या चौकशीची मागणी :
गोकुळ दूध संघातील १२०० सभासदांच्या समावेशासंदर्भातील याचिका मुंबई उच्च न्यायालयाच्या कोल्हापूर सर्किट बेंच येथे याचिका दाखल आहे. प्रकाश बेलवाडे यांनीच ही याचिका दाखल केली आहे असून यावर सुनावणी सुरु आहे. या बाराशे सभासदांना पात्र करण्यासंदर्भात वैद्यकीय शिक्षण मंत्री हसन मुश्रीफ यांनी दाखल केलेल्या आणि तत्कालीन दुग्धविकास मंत्री विखे पाटील यांनी काढलेल्या आदेशाच्या विरोधात याचिका दाखल करण्यात आली आहे.