Hasan Mushrif: मुश्रीफांचं असंही प्रेम! जगाचा पाठीवर कुठेही असले तरी; Whatsapp वरुन म्हशींवर 'असं' ठेवतात लक्ष

Hasan Mushrif News : वैद्यकीय शिक्षण मंत्री हसन मुश्रीफ यांचा हजरजबाबीपणा अनेकदा चर्चेत असतो. कुठला मुद्दा राजकीय दृष्ट्या कसा पटवून सांगावा? याची कला मंत्री मुश्रीफ यांच्यामध्ये आहे. मग तो राजकीय मुद्दा असो वा सहकारातील. सध्या गोकुळ दूध संघातील डिबेंचरचा मुद्दा तापला असताना गोकुळ दूध संघातील एका कार्यक्रमात त्यांच्या एका वक्तव्यानं याचा पुन्हा प्रत्यय आला आहे. गोकुळ दूध संघातील दूध संकलनाचा मुद्दा स्पष्ट करत असताना त्यांनी आपल्या गोठ्यातील म्हशींवर किती प्रेम आहे, हे दाखवून दिलं आहे.

सध्या गोकुळ दूध संघाकडून दैनंदिन 18 लाख लिटर दूध संकलनाचा टप्पा पार केला आहे. गोकूळ समोरील नवीन आव्हाने पाहता दिवाळीच्या पार्श्वभूमीवर गोकूळ प्रशासनाला, संचालकांना आणि दूध उत्पादकांना नवे आव्हान मंत्री मुश्रीफ यांनी दिले आहे. आजपासून दिवाळीला सुरुवात होत आहे, याच्या पार्श्वभूमीवर गोकूळ दूध संघाकडून वसुबारस निमित्त गाय आणि वासराची पूजा करण्याचा कार्यक्रम आज आयोजित केला होता.

या कार्यक्रमादरम्यान मंत्री मुश्रीफ यांनी बोलताना, गोकुळ दूध संकलनाचा आपण 18 लाख लिटरचा टप्पा पूर्ण केला आहे. आता हे टार्गेट 18 लाखांवरून 25 लाख लिटर दूध संकलनाचे टार्गेट आपण स्विकारूया, असं आवाहनही त्यांनी केलं. हे करत असताना जास्तीत जास्त दूध उत्पादक शेतकरी यामध्ये कसा येईल? याचा विचार गोकूळ प्रशासनाने करायला हवा. त्यासाठी म्हैस खरेदीसाठी जिल्हा बँकेने नियम बदलून दहा हजार रुपयांचं अनुदान देण्याची घोषणा केली, त्याचा फायदा अनेकांनी घेतला.

पण आता गोकूळ प्रशासनानं मजुरांना हाताशी धरून त्याचा फायदा त्यांना करून द्यावा. ज्या व्यापाऱ्यांनी 25-50 म्हशी घेतल्या ते गोकुळमध्ये दूध न घालता ठिपकुर्ली येथे बर्फी तयार करणाऱ्याला दूध घालतात. त्यामुळे अशा व्यापाऱ्यांना जवळ न करता छोट्या-मोठ्या शेतकऱ्यांना हाताशी धरा आणि दूध संकलन वाढवा, असे आवाहन केले. मात्र हे सांगत असताना, त्यांनी आपल्या घरातील उदाहरण दिले. मी माझा गोठा रोज ऑनलाईन पाहतो, गोठ्यात असणाऱ्या म्हशी मी व्हॉट्सअॅपवर पाहतो. आमच्या म्हशींचे रोजचे 280 लिटर दूध संकलन आहे, अशा शब्दांत मंत्री मुश्रीफ यांनी आपल्या घरच्या जनावरांवरील प्रेम व्यक्त केलं आहे.