Mangalvedha Politic's : मंगळवेढा नगराध्यक्षपदाचा पदभार स्वीकारताच सुनंदा आवताडेंची मोठी घोषणा; ‘पती अन्‌ मुलाची मदत न घेता....’

Mangalvedha, 05 January : गेली 40 वर्षे माझा आणि राजकारणाशी काही संबंध नव्हता; तरीही नगरपालिका निवडणुकीत थेट नगराध्यक्षपदासाठी उभे राहिले. मंगळवेढा शहरातील नागरिकांनी माझ्यावर भरभरून प्रेम करत मला नगराध्यक्षपदाची जबाबदारी सोपवली. ती जबाबदारी मी माझ्या मुलाची आणि पतीची मदत न घेता यशस्वी करून दाखवेन, असा विश्वास नवनिर्वाचित नगराध्यक्षा सुनंदा आवताडे यांनी बोलून दाखवून दिला.

नुकत्याच झालेल्या नगरपालिका निवडणुकीत थेट नगराध्यक्ष झालेल्या सुनंदा आवताडे (Sunanda Autade) यांनी आज (ता. ०५ जानेवारी) नगरपालिका कार्यालयात पदभार घेतला. त्यावेळी झालेल्या सत्कार समारंभानंतर आवताडे बोलत होत्या. आवताडे यांच्या या घोषणेने विरोधकांना सडेतोड उत्तर दिल्याचे मानले जात आहे.

नगराध्यक्षा सुनंदा आवताडे म्हणाल्या की, मंगळवेढा (Mangalvedha) शहरातील जनतेने दिलेली जबाबदारी मी आईच्या भूमिकेतून यशस्वीपणे पार पाडणार आहे. प्रचारादरम्यान दिलेल्या आश्वासनांमधील मुलभूत प्रश्नांची सोडवणूक करण्यास माझे प्राधान्य असणार आहे.

तीर्थक्षेत्र आघाडीचे नेते भगीरथ भालके म्हणाले, मंगळवेढा शहराच्या विकासासाठी जनतेला दिलेल्या आश्वासनासाची पूर्तता करण्यासाठी सर्वानी एकदिलाने प्रयत्न करावेत. निधीसाठी मुख्यमंत्री, उपमुख्यमंत्री, नगरविकास मंत्री यांना भेटून पाठपुरावा करण्यात येईल.

या वेळी नगरसेवक सोमनाथ माळी यांनी शहरात संतसृष्टी उभारण्यासाठी पडीक शासकीय जागांचा वापर करावा, भूमिगत गटार, हद्दवाढ या प्रश्नाला प्राधान्य द्यावे, अशी मागणी केली आहे.

जिल्हा बॅंकेचे माजी उपाध्यक्ष बबनराव अवताडे, तीर्थक्षेत्र विकास आघाडीचे भगीरथ भालके, अरूण किल्लेदार, माजी नगराध्यक्षा अरुणा माळी, नगरसेवक सोमनाथ माळी, प्रमोद सावजी, प्रशांत गायकवाड, अनिल बोदाडे, प्रीती सूर्यवंशी, विद्याराणी अवघडे, सीमा बुरजे, अश्विनी धोत्रे, नागर गोवे, रामचंद्र वाकडे, सिध्देश्वर आवताडे, सुशील आवताडे, प्रतिक किल्लेदार, संदीप फडतरे, कमालपाशा मुल्ला, महादेव धोत्रे, गणेश धोत्रे, आयाज शेख, यश नागणे, अजित यादव, आयेशा शेख आदी उपस्थित होते.