Jayant Patil : 'भाजपची अवस्था 'पिंजरा'तील मास्तरसारखी, तमाशाचा एवढा नाद लागलाय की, सगळे काँग्रेसमधले...' जयंत पाटलांचा हल्लाबोल

Sangli News, 09 Jan : राज्यातील २९ महानगरपालिकांच्या निवडणुकीच्या प्रचारासाठी राजकीय नेते मैदानात उतरले आहेत. या प्रचारा दरम्यान आता आरोप-प्रत्यारोपाच्या फैरी झडू लागल्या आहेत. अशातच सांगली महानगरपालिकांच्या प्रचारसभेत बोलताना शरद पवारांच्या राष्ट्रवादीचे आमदार जयंत पाटील यांनी भाजपवर जोरदार हल्लाबोल केला आहे.

या सभेत बोलताना जयंत पाटलांनी भाजपची तुलना पिंजरा चित्रपटातील मास्तरशी केली आहे. ते म्हणाले, 'सध्या भाजपची अवस्था पिंजरा चित्रपटातील मास्तराप्रमाणे झाली आहे. या मास्तराला तमाशाचा इतका नाद लागला की मास्तर तुणतुणे हातात घेऊन पुढे उभं रहायला लागला, असं म्हणत त्यांनी भाजपच्या भ्रष्टाचाराच्या विरोधातील भूमिकेवरून टोला लगावला.

शिवाय न खाऊंगा ना खाने दुंगा असं ते सांगायचे पण, 'ये बंद करने आए थे तवायफों के कोठे मगर; सिक्कों की खनक देखकर खुद ही मुजरा कर बैठे', असा शेर म्हणत जयंत पाटलांनी भाजपवर निशाणा साधला. ' आज भाजपमध्ये सगळे काँग्रेसमधले ओढून नेलेत. आता आपले गडी देखील तिकडे निघालेत.

काँग्रेस सर्वधर्मभावाचा विचार घेऊन चालते म्हणून तुम्ही साथ दिली. आणि आता काँग्रेस सोडून जातीयवादी झेंडा घेण्यापूर्वी त्या व्यक्तीने दहा वेळा विचार करायला पाहिजे. मात्र दुर्दैवाने ती परिस्थिती नाही,' अशी खंत देखील जयंत पाटलांनी बोलून दाखवली.

दरम्यान, यावेळी त्यांनी भाजपच्या हिंदुत्ववादी भूमिकेवर प्रश्न उपस्थित करत अकोल्यात एमआयएम सोबतच्या युतीचा दाखला देत भाजपचे दाखवायचे दात वेगळे असू सत्तेसाठी कुणाशीही आघाडी करायला यांना काही वाटत नाही.

काँग्रेसमुक्त भारत करायला निघालेला भाजप आता काँग्रेसयुक्त झाला आहे, असा टोला देखील पाटील यांनी यावेळी लगावला. शिवाय आता नवा पर्याय म्हणून सांगलीकर या महापालिकेच्या निवडणुकीत काँग्रेस आणि शरद पवारांच्या राष्ट्रवादीला स्वीकारतील असा विश्वास जयंत पाटलांनी व्यक्त केला.