सचिन शिंदे :
विधानसभा निवडणुकीत माजी मुख्यमंत्री पृथ्वीराज चव्हाण यांचा पराभव झाल्यानंतर, भाजपने कराड नगर परिषद निवडणुकीवर लक्ष केंद्रित केले आहे. भाजप आणि काँग्रेस यांच्याबरोबरच लोकशाही-यशवंत आघाडीही रिंगणात असल्यामुळे ही तिरंगी लढत चुरशीने होणार आहे.
सुमारे 170 वर्षांच्या कराड पालिकेत सत्ता काबीज करण्याची तयारी केलेल्या भाजपच्या विरुद्ध समविचारी पक्षांची साथ घेत माजी मंत्री बाळासाहेब पाटील व शिवसेनेचे राजेंद्रसिंह यादव यांची लोकशाही-यशवंत विकास आघाडी निवडणुकीच्या रणांगणात उतरली आहे. अस्तित्वाच्या या लढाईत काँग्रेसने महाविकास आघाडीसोबत न राहता नगरसेवक पदाच्या काही उमेदवारांसह नगराध्यक्षपदाचा उमेदवार देत स्वबळाचा नारा दिला आहे. त्यामुळे नगराध्यक्षपदासाठी तिरंगी, तर बहुतांश प्रभागांत लोकशाही-यशवंत विकास आघाडी आणि भाजपमध्ये लढत होणार आहे.
माजी सहकार मंत्री बाळासाहेब पाटील, पालिकेचे माजी उपाध्यक्ष राजेंद्रसिंह यादव यांनी भाजपला रोखण्यासाठी आव्हान दिले आहे. पालिकेत 2016 मध्ये सत्तांतर झाले. त्यात भाजपचा नगराध्यक्ष व चार जागा विजयी झाल्या. विरोधी आघाडी बहुमतात असली, तरी नगराध्यक्षपदाला गवसणी घातल्याने कारभारावर वरचष्मा भाजपचा होता.
या निवडणुकीत सर्व सत्ता काबीज करण्यासाठी भाजपचे आमदार अतुल भोसले यांनी सुरुवातीपासून प्रयत्न सुरू केले. काही गटांना आपले करत त्यांनी उमेदवारी अर्जातील बंडखोरीही मोडून काढली. त्यामुळे भाजपने प्रचारात आघाडी घेतली आहे. दुसरीकडे माजी मंत्री बाळासाहेब पाटील व पालिकेचे माजी उपाध्यक्ष राजेंद्रसिंह यादव यांनी एकत्र येत स्थानिक लोकशाही-यशवंत आघाडी स्थापन केली आहे. त्यातून त्यांनी भाजपसमोर कडवे आव्हान उभे केले आहे.
माजी मुख्यमंत्री पृथ्वीराज चव्हाण यांच्या मतदारसंघातील ही नगरपालिका आहे. या ठिकाणी महाविकास आघाडीच्या माध्यमातून काँग्रेस भाजपला सामोरे जाईल, अशी अपेक्षा होती. मात्र, अस्तित्वाची लढाई असतानाही काँग्रेसने नगराध्यक्षपदासाठी, तसेच नगरसेवक पदाच्या काही जागांसाठी उमेदवारही उभे करत कऱ्हाड पालिकेची निवडणूक तिरंगी केली आहे. त्याचा फायदा भाजपला होण्याची शक्यता नाकारता येत नाही.
कराड पालिकेची स्थापना 1855 मध्ये झाली. पालिकेची 170 वर्षांची वाटचाल सुरू आहे. यंदा पालिकेच्या सार्वत्रिक निवडणुकीत 15 प्रभागांतून 31 नगरसेवक व थेट नागरिकांतून नगराध्यक्ष निवडायचा आहे. भाजपने 2016 मध्ये केवळ मोजक्या जागा तर काँग्रेसने स्थानिक आघाडी करत पूर्ण ताकदीने निवडणूक लढवली होती. त्यावेळी काँग्रेस आघाडी बहुमतात आली. तर, भाजप नगराध्यक्षपदासह चार नगरसेवकपदावर विजयी झाले होते.
यंदा भाजपने माजी नगरसेवक विनायक पावसकर यांना नगराध्यक्ष पदाची उमेदवारी दिली आहे. भाजपच्या (BJP) या उद्दिष्टाला रोखण्यासाठी स्थानिकांनी लोकशाही-यशवंत अशा आघाडीद्वारे आव्हान दिले आहे. माजी मंत्री बाळासाहेब पाटील यांची लोकशाही, तर माजी उपाध्यक्ष राजेंद्रसिंह यादव यांच्या यशवंत विकास आघाडीचा यात समावेश आहे. नगराध्यक्ष पदासाठी स्वत: राजेंद्रसिंह यादव उभे आहेत. काँग्रेसला मोजक्याच वॉर्डामध्ये उमेदवार मिळाले आहेत. परंतु, त्यांनी नगराध्यपदासाठीही उमेदवार दिला आहे. त्यामुळे तिन्ही पक्षांनी नगराध्यपदावर लक्ष केंद्रीत केले आहे.
कऱ्हाड दक्षिण हा सातारा जिल्ह्यातील अत्यंत महत्त्वाचा मतदारसंघ आहे. माजी मुख्यमंत्री पृथ्वीराज चव्हाण या मतदारसंघाचे नेतृत्व करत होते. त्यांना यावेळी आमदार अतुल भोसले यांनी मात दिली. माजी आमदार बाळासाहेब पाटील कऱ्हाड उत्तरमधून निवडणूक लढतात. परंतु, कराड पालिकेतही त्यांचे संघटन आहे. या दोन महत्त्वाच्या नेत्यांची या पालिकेवर पकड राहिली आहे.
राजेंद्रसिंह यादव यांची यशवंत विकास आघाडी व जाधव गटाची जनशक्ती आघाडी या स्थानिक आघाड्यांसोबत सोबत घेऊन त्यांनी आजवर पालिकेचे राजकारण केले आहे. परंतु, यंदा पक्षीय पातळीवर भाजपने आव्हान दिले आहे. जनशक्ती आघाडी त्यांनी सोबत घेतली आहे. तर, माजी आमदार पाटील यांनी यशवंत विकास आघाडीशी युती केली आहे. त्यामुळे पक्षीय राजकारणापेक्षा आघाड्यांचे स्थानिक राजकारण कऱ्हाड पालिका निवडणुकीला कलाटणी देणारे ठरणार आहे.
साताऱ्यात मनोमिलनातून भाजपचा वरचष्मा
मलकापूरमध्‍ये भाजप विरुद्ध राष्‍ट्रवादी
पाचगणीत राष्‍ट्रवादीविरुद्ध लक्ष्‍मी कऱ्हाडकर गट
फलटणमध्‍ये भाजप, राष्‍ट्रवादीविरुद्ध शिवसेना
म्‍हसवडमध्‍ये भाजपविरुद्ध राष्‍ट्रवादीसह सर्वपक्षीय आघाडी
रहिमतपूरमध्‍ये राष्‍ट्रवादी, शिवसेनाविरुद्ध भाजप
वाईमध्‍ये भाजपविरुद्ध राष्‍ट्रवादी
महाबळेश्‍‍वरमध्‍ये तिरंगी लढत
मेढ्यात भाजपविरुद्ध शिवसेना व शरद पवारांच्या राष्‍ट्रवादीची युती
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.