Kolhapur Politics : पालकमंत्र्यांनी झुकवलं, मुश्रीफही एक पाय मागे आले : केडीसीचा अहवाल नव्याने छापत आबिटकरांना झळकवलं

Kolhapur News, 04 Sep : कोल्हापूर जिल्ह्यातील महायुतीतील नेत्यांमध्ये समन्वय नाही, अशा पद्धतीचे चित्र गेल्या अनेक दिवसांपासून विविध कार्यक्रमातून आणि उपक्रमातून स्पष्ट होत आहे. अशातच कोल्हापूर जिल्हा बँकेच्या अहवालात पालकमंत्री प्रकाश आबिटकर यांचे छायाचित्र नसल्याने महायुतीमधील अंतर्गत कटकारस्थान समोर आले होते.

आगामी महापालिका आणि जिल्हा परिषदेच्या निवडणुकीत महायुतीला तडा जाऊ नये यासाठी मंत्री आणि जिल्हा बँकेचे अध्यक्ष हसन मुश्रीफ यांनीच एक पाय मागे घेत केडीसी बँकेच्या अहवालात पालकमंत्री आबिटकर यांचा फोटो छापला आहे.

कोल्हापूर जिल्हा मध्यवर्ती बँकेने यापूर्वी संस्थांना पाठवलेल्या वार्षिक अहवालात पालकमंत्री प्रकाश आबिटकर यांचे छायाचित्र नसल्याने आलेल्या उलटसुलट प्रतिक्रिया समोर आल्या होत्या. अखेर बँकेने नव्याने छापलेल्या अहवालात आबिटकर यांचे छायाचित्र झळकले आहे. दरवर्षी जिल्हा बँकेकडून वार्षिक सर्वसाधारण सभेपूर्वी बँकेच्या प्रगतीचा अहवाल प्रसिद्ध केला जातो.

यात छत्रपती शिवाजी महाराज, शाहू महाराज, डॉ. बाबासाहेब आंबेडकर यांच्यासह मुख्यमंत्री, उपमुख्यमंत्री, जिल्ह्यातील मंत्री, पालकमंत्री यांचे छायाचित्र प्रसिद्ध केले जाते. सर्वसाधारण सभेपूर्वी किमान तीन आठवडे हे अहवाल छापून सभासद संस्थांना पाठवण्याची प्रथा आहे.

यावर्षी प्रथेप्रमाणे बँकेने अहवाल छापले व संस्थांना पोस्टाने पाठवले. यात पालकमंत्री आबिटकर यांचे छायाचित्र नव्हते. यापूर्वी बँकेत ज्यावेळी संचालक मंडळ आले, तेव्हापासून जिल्ह्याच्या पालकमंत्र्यांचे छायाचित्र छापले जाते. पण, यावेळी आबिटकर यांचे छायाचित्र नसल्याने त्याच्या प्रतिक्रिया उमटू लागल्या.

आबिटकर यांचे बंधू अर्जुन आबिटकर हे बँकेचे संचालक असूनही पालकमंत्र्यांचे छायाचित्र नव्हते. तशा बातम्याही वृत्तपत्रातून प्रसिद्ध झाल्यानंतर बँकेने दुरूस्ती करून नव्याने काही अहवाल छापून त्यात पालकमंत्री आबिटकर यांचे छायाचित्र प्रसिद्ध केले असून नवे अहवालही संस्थांना पाठवले आहेत.