Kolhapur Stadium : कोल्हापुरातील आंतरराष्ट्रीय क्रिकेट स्टेडियमला अजितदादांचे नाव, आमदार अमल महाडिक यांनी सांगितलं कोणाची कृपा

Kolhapur International Cricket Stadium : उपमुख्यमंत्री अजित पवार यांच्याकडे क्रिकेटसाठी जागा मागणीसाठी गेलो त्यावेळी अजित पवार यांनी कोल्हापूरच्या क्रीडा क्षेत्राविषयी चांगले कौतुक केले होते. ज्यावेळी आम्ही क्रिकेट स्टेडियम साठी 15 एकर जागा ही आमदार अमल महाडिक यांनी अजितदादा यांच्याकडे मागितली. त्यावेळी उपमुख्यमंत्री अजित पवार यांनी, कोल्हापूर नगरी ही क्रीडा पंढरी आहे. भविष्यातून या ठिकाणाहून आंतरराष्ट्रीय खेळाडू घडणार आहेत.

15 एकर मध्ये हे स्टेडियम होणार नाही. तुम्हाला हे स्टेडियम अद्यावत आणि अत्याधुनिक करण्यासाठी 30 एकर जागा हवी. ती जागा मी तुम्हाला उपलब्ध करून देतो. ती जागा उपमुख्यमंत्री अजित पवार यांनी मंजूर करून दिली अशी आठवण आमदार अमल महाडिक यांनी सभागृहात सांगितली.

हे स्टेडियम उभा करण्यासाठी उपमुख्यमंत्री अजित पवार यांचं मोठं योगदान आहे. त्यामुळे या स्टेडियमला उपमुख्यमंत्री अजित पवार यांचे नाव द्यावे. अशी मागणी पालकमंत्री प्रकाश आबिटकर यांच्यापुढे आमदार अमल महाडिक यांनी केली. याची तात्काळ दखल घेत पालकमंत्री आबिटकर यांनी जिल्हा नियोजन समितीच्या बैठकीत तसा ठराव करू आणि त्यासाठी अजितदादांचे नाव देऊ, असे आश्वासन दिले.

कोल्हापूर जिल्ह्याला जागतिक क्रीडा नकाशावर नेण्यासाठी राज्य सरकारने मोठा निर्णय घेतला असून करवीर तालुक्यातील विकासवाडी येथे आंतरराष्ट्रीय दर्जाचे क्रिकेट स्टेडियम उभारण्याच्या प्रस्तावाला राज्य मंत्रिमंडळाने मंजुरी दिली आहे. या महत्त्वाकांक्षी प्रकल्पासाठी 12.76 हेक्टर जमीन विनामूल्य उपलब्ध करून देण्याचा ऐतिहासिक निर्णय घेण्यात आला आहे.

मौजे विकासवाडी (ता. करवीर) येथील गट क्रमांक 110 व 111 मधील एकूण 12.76 हेक्टर (आर) क्षेत्राचे हस्तांतरण महसूल विभागाकडून 'शालेय शिक्षण व क्रीडा विभाग' यांच्याकडे करण्यास मुख्यमंत्री देवेंद्र फडणवीस यांनी हिरवा कंदील दाखवला.