Kolhapur News: विधानसभा निवडणुकीत सोयीस्कर भूमिका घेतलेल्या माजी आमदार के पी पाटील यांनी घरवापसी केल्यानंतरही पुन्हा एकदा महायुतीचे वावडे आहे की काय? असा सवाल काल झालेल्या मेळाव्यानंतर उपस्थित होत आहे.
आगामी स्थानिक स्वराज्य संस्थांसह सर्व निवडणुकांमध्ये राधानगरी आणि भुदरगड तालुक्यामध्ये सन्माननीय तोडगा निघत असेल तरच आम्ही युतीबरोबर, अन्यथा कार्यकर्ते सांगतील ती दिशा ठरवू. कार्यकर्त्यांना वाऱ्यावर सोडणार नाही, त्यांचे वाटोळे करणार नाही, असे वक्तव्य माजी आमदार के पी पाटील यांनी राष्ट्रवादीच्या राशिवडे येथे झालेल्या बैठकीत केले.
विधानसभा निवडणुकीत महायुती सोडून ठाकरेंच्या शिवसेनेसोबत जाण्याचा निर्णय माजी आमदार के पी पाटील यांनी घेतला होता. निवडणूक होताच पुन्हा एकदा राष्ट्रवादी सोबत आले. त्याला दीड महिना उलटल्यानंतर पुन्हा एकदा महायुतीच्या विरोधात जाण्याची भाषा केल्यानंतर पाटील पुन्हा चर्चेत आले आहेत.
के. पी. पाटील म्हणाले, ‘अजित पवार यांनी कोल्हापूरसाठी भरभरून निधी दिलाच, परंतु त्यांच्यावर प्रेम करणारे कार्यकर्तेही तितकेच मोठे आहेत. गेल्या विधानसभेसाठी मोठी लढाई झाली. अपयश आले, मात्र लोक आमच्यासोबतच राहिले. ही आमची येथली ताकद आहे.
या ताकदीला आगामी कोणत्याही निवडणुकीत तडा जाऊ दिला जाणार नाही. आम्हाला सन्मानाची तडजोड मान्य होईल. आम्ही कार्यकर्त्यांना वाऱ्यावर सोडणारे नाही," यावेळी त्यांनी काँग्रेसचे राहुल पाटील यांचे नाव न घेता, ‘आता अडून राहू नका, लवकर या,’ असे आवाहनही केले.
मेळाव्यात पुणे पदवीधर मतदारसंघातून राष्ट्रवादीचा दावा करत भैय्या माने यांच्यासाठी उपमुख्यमंत्री अजित पवार यांच्याकडे उमेदवारी मागणार असल्याचेही या बैठकीत माजी आमदार के पी पाटील यांनी सांगितले. दरम्यान, राधानगरी भुदरगड विधानसभा मतदारसंघातील राजकीय परिस्थितीचा अंदाज घेतला तर आगामी स्थानिक स्वराज्य संस्थेच्या निवडणुकीत शिवसेना आणि राष्ट्रवादी यांचे मनोमिलन होणे आव्हान असणार आहे.
पालकमंत्री प्रकाश आबिटकर आणि माजी आमदार के पी पाटील यांचा राजकीय संघर्ष जिल्ह्याला सर्वश्रुत आहे. पार्श्वभूमीवर सुरुवातीपासूनच माजी आमदार के पी पाटील यांनी महायुतीतील विरोधाची भाषा बोलून दाखवल्यानंतर ती होण्याआधीच तोडण्याची भाषा केल्याने माजी आमदार के पी पाटील चर्चेत आले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.