Kolhapur Politics : 'महाडिकांच्या' दक्षिणवर 'शिवसेनेची' नजर; भाजप-ताराराणी फोडल्याने महायुतीत छुपा संघर्ष

Kolhapur Politics : "उत्तरेसोबतच आता दक्षिणवरही भगवा फडकवणार..." कोल्हापूर उत्तर मतदारसंघाचे शिवसेना आमदार राजेश क्षीरसागर यांनी नुकताच हा दावा केला. काँग्रेस, भाजप आणि ताराराणी आघाडीतील माजी नगरसेवकांचा आणि पदाधिकाऱ्यांचा पक्षप्रवेश पार पडताच थेट भाजप आमदार असलेल्या कोल्हापूर दक्षिण मतदारसंघावरच क्षीरसागर यांनी शिवसेनेचा दावा सांगितला आहे. आधीच मित्रपक्ष असूनही भाजप-ताराराणी आघाडी फोडून शिवसेनेने महाडिक बंधूंना धक्का दिला. आता त्यांच्या दक्षिण मतदारसंघावरच दावा सांगितल्याने महायुतीतील छुपा संघर्ष उघड झाला आहे.

काही दिवसांपूर्वीच आगामी स्थानिक स्वराज्य संस्थेच्या निवडणुकीत महायुतीतील सर्वच मंत्र्यांनी शासकीय विश्रामगृहात बैठक घेत निवडणुका एकत्र लढवण्याची घोषणा केली. त्याला आठवडा होत नाही तेच काँग्रेस आणि ताराराणी आघाडीतील माजी नगरसेवक-पदाधिकाऱ्यांचा शिवसेना प्रवेश पार पडला. त्यानंतर लगेचच आमदार राजेश क्षीरसागर यांनी कोल्हापूर दक्षिण विधानसभा मतदारसंघावर दावा केला. या मतदारसंघातून सध्या भाजपचे अमल महाडिक आमदार आहेत. शिवसेनेने दिलेल्या धक्क्यामुळे आणि क्षीरसागर यांनी केलेल्या दाव्यामुळे महायुतीमध्ये समन्वय ठेवणे अधिक आव्हानात्मक असणार आहे.

माजी नगरसेवक शारंगधर देशमुख, दोन माजी महापौर यांच्यासह 23 माजी नगरसेवक आणि पदाधिकार शिवसेनेत गेले. खरंतर यामुळे काँग्रेसला अधिक नुकसान होईल, अशी चर्चा होती. मात्र, ताराराणी आघाडीला मोठे नुकसान सहन करावे लागले. आता आगामी महानगरपालिका निवडणुकीत स्वाभाविकपणे शिवसेनेतून या सर्वांनाच उमेदवारी दिली जाईल. पण क्षीरसागर यांच्या विधानामुळे दक्षिण मतदारसंघातही नव्या राजकारणाची सुरुवात झाली आहे. दक्षिण मतदारसंघातील 4 ते 5 वॉर्डमध्ये देशमुख यांची चांगली ताकद आहे.

जागा वाटपावरूनही संघर्ष अटळ :

सुरुवातीला शिवसेनेतील पक्षप्रवेशात काँग्रेस नगरसेवकांची संख्या जास्त आहे असे भासवले गेले. प्रत्यक्षात ताराराणी आघाडीतील 7 आणि भाजपचे 4 माजी नगरसेवक शिवसेनेत गेले आहेत. सर्वाधिक नगरसेवक हे महायुतीतील असल्याने भविष्यात जागा वाटपात दोन्ही पक्षांमध्येच मोठी अडचण होणार आहे. त्यामुळे आगामी स्थानिक स्वराज्य संस्थांच्या निवडणुकीत महायुतीतील संघर्ष अटळ असल्याचे देखील सांगितले जाते.