Malshiras News, 30 Nov : 'माळशिरस विधानसभा मतदारसंघाचे भाजप उमेदवार राम सातपुतेंनी त्यांना आतून मदत करण्यासाठी मला 50 कोटींची ऑफर मला दिली होती', असा खळबळजनक गौप्यस्फोट जयसिंह मोहिते पाटील यांनी केला आहे. ते अकलूज येथील प्रचाराच्या सांगता सभेत बोलत होते.
त्यांच्या या वक्तव्यामुळे आता विविध राजकीय चर्चांना उधाण आलं असून अकलूजमधील राजकारण देखील चांगलं तापल्याचं दिसत आहे. स्थानिक स्वराज्य संस्थांच्या निवडणुकीच्या प्रचाराची सांगता सभेत अनेक नेत्यांनी विरोधकांवर सडकून टीका केल्याचं पाहायला मिळालं.
अशातच अकलूज येथील सांगता सभेत बोलताना जयसिंह मोहिते पाटलांनी राम सातपुते यांच्यावर गंभीर आरोप केला. ते म्हणाले, 'विधानसभेला राम सातपुतेंनी त्यांना आतून मदत करण्यासाठी 35 कोटींची ऑफर मला दिली. ते मला देवेंद्र फडणवीसांकडे घेऊन गेले होते. मात्र मी एकदा दिलेला शब्द बदलत नाही, असं सांगून माघारी आलो.
तर निवडणुकीच्या आधी चार दिवस ही ऑफर तब्बल 50 कोटींपर्यत गेली होती.' अकलूजमधील विजय चौकात ज्येष्ठ नेते विजयसिंह मोहिते पाटील यांच्या उपस्थितीत प्रचाराची सांगता सभा पार पडली. यावेळी शरद पवारांच्या राष्ट्रवादीचे खासदार धैर्यशील मोहिते पाटील, आमदार उत्तम जानकर आणि महबूब शेख उपस्थित होते.
यावेळी बोलताना मोहिते पाटील म्हणाले, 'लोकसभा निवडणुकीत धैर्यशील मोहिते पाटील आणि उत्तम जानकर आपल्याकडे आले होते. यावेळी जानकरांना निवडून आणण्याचा शब्द मी दिला होता आणि पाळण्यासाठी मी ती ऑफर धुडकावली, पण शब्द मोडला नाही. मी राम सातपुतेला सोलापूर उभा राहू नकोस पडशील, असं सांगितलं होतं.
कारण सोलापूर लोकसभा मतदारसंघात विजयदादांना मानणारे 80 हजारांहून जास्त मतदार आहेत. तू दादांना दगा देऊन तिकडे गेल्यास तुझा पराभव नक्की होईल, असं सांगितलं, पण सातपुतेंनी माझं ऐकलं नाही.' दरम्यान, सोलापूरनंतर माळशिरस मध्येही उभं राहू नकोस, पुन्हा पडशील, असंही मी सातपुतेला सांगितलं होतं.
कारण मागील वेळी अकलूजकरांनी तुला 19 हजाराचे लीड दिले आणि त्यावेळी जानकरांचा 2600 मतांनी पराभव झाला होता, असं सांगितल्याचंही मोहिते यांनी या सभेत बोलताना सांगितलं. तसंच या सांगता सभेत त्यांनी यावेळी सर्वच्या सर्व 26 नगरसेवक आणि एक नगराध्यक्ष विजयी होतील असा दावाही केला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.