Municipal Election : मेढा नगरपंचायतीच्या प्रभागांपैकी दोन प्रभाग 17 बिनविरोध झाल्याने उर्वरित पंधरा प्रभागांसाठी भाजपचे 15, शिवसेनेचे 13 व राष्ट्रवादी काँग्रेस शरदचंद्र पवार पक्षाचे पाच ठिकाणी उमेदवार रिंगणात आहेत. तिन्ही प्रमुख पक्षांसह सहा अपक्षही मैदानात राहिल्याने मेढा नगरपंचायतीची निवडणूक बहुरंगी होणार आहे.
मेढा शहरात सार्वजनिक बांधकाममंत्री शिवेंद्रसिंहराजे यांचा गट प्रबळ असून, सर्वाधिक 75 जण भाजपकडून निवडणूक लढविण्यास इच्छुक होते. नगराध्यक्षपदासाठी तब्बल अकरा जणांनी पक्षाकडे मागणी केली होती. त्यामुळे उमेदवारी देताना पक्ष नेतृत्वाला मोठी कसरत करावी लागली. भाजपने धाडसी निर्णय घेत जुन्या व मातब्बर नगरसेवक, नगराध्यक्ष मंडळींना डच्चू देत नवीन चेहऱ्यांना संधी दिली. सर्व सतरा प्रभागांत उमेदवार देऊन दोन जागा बिनविरोध करत भाजपने आघाडी घेतली आहे.
भाजपला टक्कर देण्यासाठी महायुतीतील शिवसेना आक्रमकपणे पुढे येत त्यांनी 13 प्रभागांत आपले उमेदवार उभे करण्यात यश मिळवले. राष्ट्रवादी काँग्रेस शरदचंद्र पवार पक्षानेही नगराध्यक्षपदासाठी अर्ज दाखल केला; परंतु ऐनवेळी नगराध्यक्षपदाच्या निवडणुकीतून माघार घेत फक्त 5 ठिकाणी उमेदवार देण्यात यश मिळवले. प्रबळ भाजपला टक्कर देण्यासाठी शिवसेना व राष्ट्रवादी एकत्र येण्याची चर्चा खूप झाली, त्यादृष्टीने वरिष्ठ नेत्यांच्या बैठकाही झाल्या; परंतु प्रभाग 7 व 9 दोघांनाही हवा असल्याने ही युती फिसकटली.
मंत्री शिवेंद्रसिंहराजे यांच्याविरोधात जावळीत कोण बोलणार?, कोण शड्डू ठोकणार? असे प्रश्न असताना स्वराज पक्षाकडून राजकारणाची सुरुवात करणाऱ्या अंकुश कदम या भुमिपुत्राने शिवसेनेत प्रवेश करत थेट जावळीत भाजपला आव्हान देण्याची तयारी केली. मेढ्यात त्यांच्या पाठिंब्यावरच शिवसेना स्पर्धेत आली असून, बाबाराजे विरुद्ध अंकुशबाबा हा संघर्ष आगामी काळातही पाहावयास मिळणार आहे.
वॉर्ड क्रमांक एकमधून विनायक सपकाळ (शिवसेना), सुशांत कांबळे. (भाजप), सुनील तांबे (अपक्ष) असा सामना रंगेल. सुनील तांबे माजी नगरसेवक असून, भाजपचे उमेदवार सुशांत कांबळे यांच्या पाठीशी मेढ्याचे माजी सरपंच राहिलेले डॉ. संपतराव कांबळे यांची वडील म्‍हणून असलेली मोठी ताकद लक्षवेधी ठरणार आहे, तर शिवसेनेचे विनायक सपकाळ आपल्या संपर्काच्या जोरावर बाजी पालटवू शकतात.
वॉर्ड दोनमध्‍ये प्रियांका सपकाळ (शिवसेना), सुनीता तांबे (भाजप), सिमंतानी कांबळे (अपक्ष) अशी तिरंगी लढत असली, तरी तांबे कुटुंबीयांचे या प्रभागावर चांगले वर्चस्व आहे. वॉर्ड तीनमध्‍ये मेढ्याच्या पहिल्या नगराध्यक्षपदाचा मान पटकावलेल्या द्रौपदा मुकणे (शिवसेना), पुष्पा मुकणे (भाजप) अशी लढत होत आहे. या ठिकाणी सामाजिक कार्यकर्ते संजय संकपाळ यांचा प्रभाव असून, ते भाजप उमेदवाराच्या मागे असल्याने पुष्पा मुकणे यांचे पारडे जड वाटत आहे.
वॉर्ड क्रमांक चारमध्‍ये छकुली देशमुख, वॉर्ड क्रमांक पाचमध्‍ये आनंदी करंजेकर या बिनविरोध निवडून आल्‍याने, तेथील चुरस संपली आहे.
सोनाली पवार (शिवसेना), छाया मिस्‍त्री (भाजप), आशा नलवडे (राष्ट्रवादी शरद पवार) अशी तिरंगी लढत वॉर्ड क्रमांक सहामध्‍ये होत आहे, तर वॉर्ड सातमध्‍ये भाजपने जुन्या नगरसेवकांमधील एकमेव संधी दिलेले पांडुरंग (विकास) देशपांडे लढत असून, त्यांना संदीप जवळ (शिवसेना), प्रकाश कदम (राष्ट्रवादी शरद पवार) यांचे आव्हान असणार आहे. या ठिकाणी तिन्ही उमेदवार प्रबळ असल्याने लढत रंगतदार होणार आहे.
वॉर्ड क्रमांक 8 मध्‍ये प्रांजली पवार (शिवसेना), अश्विनी जवळ (भाजप), प्राजक्ता पार्टे (राष्ट्रवादी शरद पवार) असा तिरंगी सामना होणार आहे. सर्वात जास्त लक्षवेधक ठरणारा प्रभाग नऊ असून, या ठिकाणी चौरंगी लढत होणार आहे. शिवेंद्रसिंहराजे यांच्या विरोधात विधानसभा लढलेले अमित कदम यांच्या घरातील दीपक कदम यांनी भाजपची वाट धरून अमित कदमांनाच धक्का दिला.
त्यांच्या विरोधात सुरेश पार्टे (राष्ट्रवादी शरद पवार), पृथ्वीराज दळवी (अपक्ष), बापू जवळ (शिवसेना) असा तुल्यबळ सामना आहे. या ठिकाणी मागील वेळी बापू जवळ यांच्या पत्नी नीलम जवळ नगरसेवक होत्या. त्यामुळे त्यांना याचा फायदा होणार असला, तरी त्यावेळी त्यांच्यासोबत असलेल्‍या दळवी भावकीमधून पृथ्वीराज दळवी यांच्या अपक्ष उमेदवारीने त्यांचे गणित बिघडणार आहे.
वॉर्ड क्रमांक 10मध्‍ये नितीन पवार (शिवसेना), हरिश्चंद्र तिवाटणे (भाजप) असा दुरंगी सामना असला, तरी भाजपने (BJP) तिकीट नाकारलेले माजी उपनगराध्यक्ष दत्ता अण्णा पवार यांनी थेट तिवाटणे यांचा अर्ज अवैध ठरवण्यासाठी निवडणूक निर्णय अधिकारी यांच्याकडे तक्रार केली होती. तिवाटणे यांचा अर्ज वैध ठरला असला, तरी दत्ता अण्णा पवार यांच्यासह जुन्या मातब्बरांची भूमिका यापुढे कशी राहतेय यावर चुरस ठरणार आहे.
माजी नगराध्यक्ष राहिलेल्या पांडुरंग जवळ यांना डावलून वॉर्ड क्रमांक 11 मध्‍ये नितीन मगरे यांना भाजपने तिकीट दिले असून, शिवसेनेकडून पूजा जवळ मैदानात आहेत. याठिकाणी जवळ भावकी व पांडुरंग जवळ यांची भूमिका निर्णायक ठरणार आहे.
माजी नगरसेवक राहिलेल्या शशिकांत गुरव हे या प्रभागातून इच्छुक असताना त्यांना डावलून वॉर्ड क्रमांक 12 मधून भाजपने शिवाजी गोरे यांना उमेदवारी दिली आहे. या ठिकाणी सौरभ कुंभार (अपक्ष) हे गोरे यांना आव्हान देणार आहेत. शिवाजी गोरे यांचीही बांधणी भक्कम आहे.
वॉर्ड 13 मध्‍ये रणधीर गोरे (शिवसेना) यांना तरुण नेतृत्व असलेले रोहित देशमुख (भाजप) आव्हान देणार असून, या ठिकाणी देशमुख भावकीची भूमिका निर्णायक ठरणार आहे. वॉर्ड 14 मध्‍ये तेजस्वी इगावे (भाजप), पूनम गोरे (राष्ट्रवादी शरद पवार), नूतन क्षीरसागर (अपक्ष) असा तिरंगी मुकाबला होणार असून, तेजस्वी इगावे यांचे पारडे जड वाटत आहे.
वॉर्ड क्रमांक 15 मध्‍ये मोनिका जवळ (शिवसेना), दीपाली जवळ (भाजप) असा दुरंगी सामना होणार आहे, तर 16 मध्‍ये शर्वरी गायकवाड (शिवसेना), शुभांगी ओतारी (भाजप) ही तुल्यबळ लढत होणार आहे. 17 मध्‍ये संजय सुर्वे (शिवसेना), शिवाजी देशमुख (भाजप), नितीन देशमुख (अपक्ष) अशा ज्‍येष्‍ठ कार्यकर्त्यांमध्ये लढत रंगणार आहे.
उमेदवारी नाकारलेल्या प्रमुख चेहऱ्यात भाजपकडून इच्छुक असलेले माजी नगराध्यक्ष पांडुरंग जवळ, माजी उपनगराध्यक्ष दत्ताअण्णा पवार, कल्पना जवळ, स्वीकृत नगरसेवक शशिकांत गुरव, नवनाथ देशमुख, नगरसेवक एकनाथ तांबोळी, सुनील तांबे यांचा समावेश आहे. ही सर्व मंडळी भाजपबरोबर असली, तरी डावलल्याची सल मनात राहणार असल्याने पक्षाने दिलेल्या उमेदवाराचे काम कसे करतात यावर बराच खेळ अवलंबून असणार आहे.
मेढा नगरपंचायतीत भाजपच्‍या उमेदवारीचे निर्णय वसंतराव मानकुमरे व ज्ञानदेव रांजणे यांनी मंत्री शिवेंद्रसिंहराजे भोसले यांच्या सूचनेनुसार घेतले. शिवसेनेकडून अंकुश कदम व एकनाथ ओंबळे यांनी ही भूमिका निभावली. राष्ट्रवादीसाठी शशिकांत शिंदे यांनी पावले उचलली. राहिलेल्या आठ दिवसांत मंत्री शिवेंद्रसिंहराजे भोसले, वसंतराव मानकुमरे, ज्ञानदेव रांजणे हे भाजपकडून, तर शिवसेनेकडून अंकुश कदम, एकनाथ ओंबळे स्टार प्रचारक राहणार असून, राष्ट्रवादीकडून शशिकांत शिंदे यांनी मेढ्यात वेळ दिला, तर राष्ट्रवादीही वारे फिरवू शकणार आहे. माजी आमदार सदाशिवराव सपकाळ, अमित कदम हे जावळीतले नेते अजून तरी या निवडणुकीपासून लांबच आहेत.
नगराध्यक्ष पदाच्या शर्यतीत रेश्मा करंजेकर शिवसेना ( एकनाथ शिंदे ), रूपाली वारागडे (भाजप), शुभांगी गोरे (अपक्ष) यांच्यात तिरंगी लढत होणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
