जयंत पाटलांनी फुंकले रणशिंग : मिरजेचा पुढील आमदार राष्ट्रवादीचाच

आरग (जि. सांगली) : मिरज पूर्व भाग आणि तालुक्याच्या संपूर्ण राजकीय राजकारणावर येथून पुढे राष्ट्रवादीचेच वर्चस्व असेल. मिरज विधानसभेचा आमदार आणि तालुक्याची पंचायत समिती ही दोन्ही राष्ट्रवादीच्याच ताब्यात असेल, असा विश्वास प्रदेशाध्यक्ष व पालकमंत्री जयंत पाटील यांनी केला. (Miraj's next MLA will be from NCP: Jayant Patil)

आरग येथे राष्ट्रवादी काँग्रेस पार्टीचा जाहीर पक्षप्रवेश व कार्यकर्त्यांचा भव्य मेळावा प्रसंगी ते बोलत होते. जिल्हा मध्यवर्ती बँकेचे अध्यक्ष दिलीप (तात्या) पाटील उपस्थित होते. जिल्हा मध्यवर्ती बँकेचे अध्यक्ष दिलीप पाटील म्हणाले,‘‘जलसंपदा मंत्र्यांनी महापुराचे पाणी म्हैसाळ योजनेतून दुष्काळी भागाला पुरवले, कर्नाटकशी समन्वय साधून कृष्णेचे पाणी नियंत्रित केले.’’

संयोजक व निमंत्रक आणि मोहनराव शिंदे कारखान्याचे चेअरमन मनोजबाबा शिंदे म्हणाले,‘‘असंख्य कार्यकर्त्यांच्या जोरावर येणाऱ्या सर्वच निवडणुकीत राष्ट्रवादी काँग्रेसला मोठे यश मिळेल.’’ मिरज विधानसभा क्षेत्राध्यक्ष प्रमोद इनामदार म्हणाले,‘‘जलसंपदा मंत्र्यांनी स्वतः पूर्वभागात लक्ष घातल्याने कार्यकर्त्यांचा मोठा उत्साह वाढला आहे.’’ राष्ट्रवादीचे जिल्हाध्यक्ष अविनाश पाटील म्हणाले,‘‘ग्रामीण भागातील सर्वसामान्यांसह कार्यकर्त्यांचे अनेक प्रश्न राष्ट्रवादीने नेहमीच सोडवले आहेत.’’ मार्केट कमिटी सभापती दिनकर (तात्या) पाटील म्हणाले,‘‘कार्यकर्त्यांच्या पक्ष प्रवेशामुळे राष्ट्रवादी पार्टीला पूर्व भागात बळ मिळेल.’’

पूर्व भागातील ४२ गावांमधील कार्यकर्त्यांचा राष्ट्रवादीमध्ये मोठ्या उत्साहात पक्षप्रवेश झाला. गर्दी असूनही मेळाव्याचे नियोजन नेटक झाले होते. मेळाव्यास पूर्व भागातील कार्यकर्त्यांची लक्षणीय गर्दी होती. मेळाव्यातील जयंत पाटील यांच्या भाषणाने पूर्व भागातील कार्यकर्त्यांना मोठी ऊर्जा मिळाली अशी चर्चा होती. यावेळी ॲड . बाळासाहेब मुळीक, विराज नाईक, बाळासो व्हनमोरे, सुषमाताई जाधव, पूजाताई लाड, सौ. चंपाताई जाधव, सौ. स्मिता पाटील, शिवाजी महाडिक, गंगाधर तोडकर, वास्कर शिंदे, आप्पासाहेब हल्ले, एस. आर. पाटील, शरद ओमसे आदी उपस्थित होते. मेळाव्याचे संयोजक व निमंत्रक मोहनराव शिंदे कारखान्याचे चेअरमन मनोजबाबा शिंदे यांनी केले.

राष्ट्रवादीत यांनी केला प्रवेश

आरगमधून एस. आर. पाटील गट, बोलवाड मधून सुहास पाटील, मल्लेवाडी मधून सरपंच विनायक पाटील व सर्व सदस्य, मालगाव मधून माजी सरपंच प्रशांत माळी व कार्यकर्ते, सलगरे मधून नितीन जाधव, एरंडोली मधून बी. के. पाटील, दादासो पाटील, नारवाड मधून धनाजी पाटील, उत्तम पाटील आदी गावांसह कार्यकर्त्यांनी प्रवेश केला.