‘महिलांनी काय घालवं आणि कसं वागवं, हे भिडेंनी सांगू नये’ : प्रणिती शिंदेंचा हल्लाबोल

सोलापूर : ‘तू अगोदर कंकू लाव, त्यानंतरच मी तुझ्याशी बोलेन’ असे विधान करणारे संभाजी भिडे (Sambhaji Bhide) यांचा काँग्रेसच्या प्रदेश कार्याध्यक्षा तथा आमदार प्रणिती शिंदे (Praniti Shinde) यांनी शेलक्या शब्दांत समाचार घेतला. ‘महिलेने काय घालवं आणि कसं वागावं,’ हे त्यांनी आम्हाला सांगू नये, अशी टीका त्यांनी भिडे यांच्यावर केली आहे. (MLA Praniti Shinde criticizes Sambhaji Bhide)

मुंबईत मंत्रालयात आलेले संभाजी भिडे यांना ‘साम’च्या प्रतिनिधीने काही प्रश्न विचारले होते. त्यावर बोलताना भिडे यांनी ‘तू अगोदर कुंकू लाव, त्यानंतरच मी तुझ्याशी बोलेन’ असे म्हटले होते. त्यावरून राज्यात मोठा गदरोळ सुरू आहे. विशेषतः महिला वर्गातून त्यावर संतप्त प्रतिक्रिया येत आहेत. त्यासंदर्भात बोलताना प्रणिती शिंदेंनी भिडे यांना सुनावले.

आमदार प्रणिती शिंदे म्हणाल्या की, संभाजी भिडे आणि भाजप विचारांची लोकं ही महिलांना ऑब्जेक्टिफाय करत आहेत. प्रत्येक महिलेला एक वस्तू म्हणून बघितलं जात आहे. त्या महिलेने काय घालावं, तिने कसं वागावं, हे या लोकांनी आम्हाला हे सांगू नये. आम्हाला आमची संस्कृती आणि देशप्रेम हे हृदयात आहे. ते आम्हाला दाखविण्याची गरज नाही.

महिलांना काय घालावं आणि कस वागावं हे सांगण्याचा भिडे यांना अजिबात अधिकार नाहीय. त्यांच्या या विधानाचा आम्ही निषेध करतो. तुम्ही महिलांचे काम आणि कर्तृत्व बघत नाही. फक्त चेहऱ्यावर जाता आणि त्यांना ऑब्जेक्टिफाय करता आणि त्यांच्यावर अत्याचार करता, असे सांगून आमदार प्रणिती शिंदे यांनी भिडे यांचा निषेध व्यक्त केला.

जोपर्यंत अशा विचारांच्या लोकांची मानसिकता बदलत नाही, त्यामुळेच भाजपच्या राजवटीत महिलांवर अत्याचार होत आहेत, असेही प्रणिती शिंदे या वेळी स्पष्ट केले.