Gopichand Padalkar : सांगलीत पडळकरांच्या हाती लागला विधानसभा लढलेला भिडू? आगामी 'स्थानिक'मध्ये भाजपसह गटाची वाढणार ताकद

Sangli News : सांगली जिल्ह्यात सध्या भाजप आपली ताकद वाढवताना दिसत असून नुकताच भाजपने जिल्हा ग्रामिणची जबाबादारी सम्राट महाडिक यांच्यावर दिली आहे. महाडिक यांनी देखील भाजपविरोधकांना इशारा देताना सर्व भाजप नेत्यांची मोट बांधण्याकडे पहिले पाऊल टाकले आहे. त्याचवेळी आमदार गोपिचंद पडळकर यांनी सर्वांनी मिळून फक्त भाजपच्या वाढीसाठी प्रयत्न करूया असे आवाहन केले होते. त्याप्रमाणे पडळकर यांनी पहिला डाव टाकला आहे. त्यांनी विटा-खानापूर तालुक्यामध्ये भाजपची ताकत अधिक वाढण्यावर भर देणार पक्ष प्रवेश घडवून आणला आहे.

आगामी स्थानिकच्या तोंडावर भाजप आपली ताकद वाढवत असून जिल्ह्यात महायुतीच्या माध्यमातून निवडणूक लढवली जाईल असे आमदार सुरेश खाडे यांनी आधीच स्पष्ट केलं आहे. पण स्थानिकला युती न झाल्यास भाजपकडून स्वबळाची तयारीची रणनीती आखली जातेय. अशावेळी पक्षात नव्याने पक्ष प्रवेश होत आहेत. त्याला आता विटा आणि खानापूर तालुका अपवाद राहिलेला नाही.

पडळकर यांनी येथे नुकताच पार पडलेल्या विधानसभेतील उमेदवार असलेले संग्रामनाना माने यांचा भाजप प्रवेश घडवून आणला आहे. माने यांची जिल्ह्यातील ओबीसी नेते आणि व्हिजीएनटी परिषदेचे अध्यक्ष म्हणून अशीही ओखळ आहे. माने यांनी पडळकर यांच्या उपस्थितीमध्ये विटा येथे पक्षप्रवेश केला आहे.

गेल्या काही दिवसांपासून संग्राम माने यांना विविध पक्षांकडून पक्षप्रवेशाच्या ऑफर देण्यात येत होत्या. मात्र संग्राम माने यांनी भाजपमध्ये जाण्याचा निर्णय घेतला. त्यानुसार आता त्यांनी भाजपमध्ये प्रवेश केला आहे. ओबीसी समाजातील एक लढवय्या नेतृत्व म्हणून संग्राम माने यांची सांगलीत ओळख आहे. तर त्यांच्या भाजपच्या पक्षप्रवेशामुळे विशेषतः विटा-खानापूर तालुक्यामध्ये भाजपची ताकत अधिक वाढण्यास मदत होणार आहे.