Praniti Shinde Vs Jaykumar Gore : प्रणिती शिंदे सोलापूरच्या नव्हे तर दिल्लीच्या खासदार; पैसे वाटल्याच्या आरोपावरून गोरेंचा पलटवार

Solapur, 15 January : सोलापूरच्या खासदार प्रणिती शिंदे यांनी पालकमंत्री तथा भाजप नेते जयकुमार गोरे यांच्यावर अत्यंत गंभीर स्वरूपाचा आरोप केला आहे. पालकमंत्री स्वतः पैशाचे वाटप करत आहेत, असे काही लोकांचे मला फोन आले, असा खळबळजनक दावा खासदार शिंदे यांनी केला आहे. त्याला पालकमंत्री गोरे यांनी प्रत्युतर दिले आहे, त्यामुळे ऐन निवडणुकीच्या धामधुमीत प्रणिती शिंदे आणि पालकमंत्री गोरे यांच्यात शाब्दीक युद्ध रंगले आहे.

सोलापूर महापालिका निवडणुकीच्या निमित्ताने भाजप आणि काँग्रेस पुन्हा आमने सामने आले आहेत. त्यातून प्रणिती शिंदेंनी (Praniti Shinde) पालकमंत्र्यांना लक्ष्य केले आहे. त्या म्हणाल्या, मला काही लोकांचे फोन आले की, पालकमंत्री जयकुमार गोरे हे स्वतः पैसे वाटप करत आहेत. त्याचे फोटो आणि व्हिडिओ मला अजून काही आले नाहीत, ते येतीलच. पण असं वाटतंय की, सत्ता त्यांच्यासाठी नवीन आहे. असं भाजपच्या सध्याच्या वागण्यावरून दिसून येत आहे.

भाजप (BJP) हा सत्तेसाठी हपापलेला असल्याचे दिसून येत आहे. सत्तेसाठी भाजपवाले कोणत्याही पातळीला ही निवडणूक घेऊन जात आहेत, याबाबत मला देश, राज्य आणि सोलापूरसाठी वाईट वाटतं. आपण सर्वांनी मिळून लोकशाहीची ही लढाई व्यवस्थितपणे लढली पाहिजे. स्थानिक स्वराज्य संस्थांमध्ये जेव्हा क्रांती घडते, तेव्हा सत्ताधाऱ्यांचा अहंकार तुटत असतो, असेही प्रणिती शिंदे यांनी सांगितले.

खासदार प्रणिती शिंदे यांच्या आरोपाला पालकमंत्री जयकुमार गोरे (Jaykumar Gore) यांनी उत्तर दिले आहे. ते म्हणाले, आम्ही पैसे वाटप केले आहे. प्रणिती शिंदे सोलापूरला आल्यात का? त्या सोलापूरच्या खासदार आहेत, असा इथल्या जनतेलाही वाटत नाही. महापालिकेची अख्खी निवडणूक झाली तरी प्रणिती शिंदे यांचा कुठेही पत्ता नव्हता.

दिल्लीत राहून सोलापूरमध्ये काय चालेले आहे, हे त्यांना कसं समजलं, माहिती नाही. पण सवंग लोकप्रियतेसाठी बोल्ड वक्तव्य करणाऱ्यांची त्यांची सवय आहे. प्रसिद्धीचा स्टंट करायचा आणि त्यासाठी काय बोललं पाहिजे, याचा त्यांचा अभ्यास चांगला आहे. मला वाटतं त्यांनी काँग्रेसचा अभ्यास करून कोण उमेदवार आहेत, कुठे आहेत, याची माहिती घेऊन त्यांना मदत केली असती तर अशी बाष्कळ बडबड करण्याची त्यांच्यावर वेळ आली नसती, असा टोला जयकुमार गोरेंनी प्रणिती शिंदेंना लगावला.

गोरे म्हणाले, प्रणिती शिंदे ह्या सोलापूरच्या नव्हे, तर दिल्लीच्या खासदार आहेत. त्यांचं कार्यक्षेत्र फक्त राहुल गांधींच्या समोर सवंग लोकप्रियतेसाठी मोदींवर बोलणं आणि त्यातून सहानुभूती मिळतेय का पाहणे? एवढंच त्यांचं काम आहे. चर्चेत राहण्यासाठी मोठ्या लोकांवर बोलण्याची त्यांची पद्धत आहे. वेगळाच काहीतरी आरोप करण्याचा त्यांची सवय आहे. त्यांच्याकडून हेच अपेक्षित आहे.