Prashant Kortkar Dubai escape : कोरटकर दुबईला पळून गेल्याच्या चर्चा; इंद्रजीत सावंतांनी केली मोठी मागणी, म्हणाले, पोलिसांनी त्यांच्या पत्नीला..."

Kolhapur News, 22 Mar : छत्रपती शिवाजी महाराज यांच्याविषयी वदग्रस्त वक्तव्य आणि इतिहास संशोधक इंद्रजीत सावंत यांना जीवे मारण्याची धमकी दिल्यानंतर प्रशांत कोरटकरला (Prashant Koratkar) कोल्हापूर जिल्हा न्यायालयाने दणका दिला आहे. अंतरिम जामीनावर मुदतवाढ मागणाऱ्या कोरटकरचा जामीन अर्ज फेटाळल्यानंतर त्याने उच्च न्यायालयात दात मागितली होती.

मात्र तिथे देखील दिलासा न मिळाल्याने कोरटकर हा दुबईला पळून गेल्याची चर्चा रंगली होती. तर दुसरीकडे पोलिसांना चकवा देण्याचा प्रयत्न कोरटकर करत असल्याची माहितीदेखील आता समोर येत आहे. मात्र पोलिसांनी सर्व बाबींचा विचार करून आरोपी प्रशांत कोरटकरचा पासपोर्ट पोलिस स्टेशनला जमा करावा, अशी मागणी इतिहास संशोधक इंद्रजीत सावंत यांनी कोल्हापुरातील (Kolhapur) जुना राजवाडा पोलिस ठाण्याकडे केली आहे.

इंद्रजीत सावंत (Indrajeet Sawant) यांनी दिलेल्या निवेदनात म्हटले आहे की, मला फोन करून छत्रपती शिवाजी महाराज आणि छत्रपती संभाजी महाराज यांच्याबद्दल अपमानकारक नीच वक्तव्य व जातीमध्ये द्वेष निर्माण करणारे संभाषण याबद्दल प्रशांत कोरटकर या तथाकथित पत्रकाराविरोधात जुना राजवाडा पोलीस स्टेशनला नोंद झाला आहे.

परंतु आरोपी कोरटकर अजूनही फरार आहे. आजपर्यंत प्रशांत कोरटकर हा इंदोर, चंद्रपूर, कोलकाता अश्या ठिकाणी लपून बसल्याच्या बातम्या येत होत्या. पण आता तो थेट दुबईला पळून गेल्याचे समोर येत आहे. पोलिसांना फरार आरोपीची चौकशी करण्यासाठी सगळ्या कायदेशीर मार्गांचा वापर करण्याचा अधिकार आहे.

विनंती आहे कि, आरोपी प्रशांत कोरटकरने त्याचा पासपोर्ट पोलिस स्टेशनला आणून दाखवावा. तसेच पासपोर्ट जमा करण्याबाबत त्यांची पत्नी सौ. कोरटकर यांना उपस्थित राहण्याचे समन्स काढून पोलिसांनी त्यांची तपासात मदत घ्यावी. प्रशांत कोरटकरला लपण्यासाठी व नागपूरातून पळून जाण्यासाठी, दुबईला पलायन करण्यासाठी ज्यांनी मदत केली असेल त्यांची चौकशी करावी, अशी मागणी सावंत यांनी केली आहे.

२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप