पृथ्वीराज चव्हाणांकडे तीन राज्यांच्या प्रचार रणनीतीची जबाबदारी

कऱ्हाड : पाच राज्यांच्या निवडणुकीचे बिगुल वाजले असून या पाचही राज्यात काँग्रेस पक्ष मोठ्या तयारीने निवडणुकीत उतरला आहे. काँग्रेस पक्षाने जेष्ठ नेते राज्याचे माजी मुख्यमंत्री पृथ्वीराज चव्हाण यांच्याकडे उत्तरप्रदेश, उत्तराखंड व गोवा या तीन राज्यांच्या प्रचार रणनीतीची जबाबदारी सोपवली आहे. काँग्रेस पक्षाच्या राष्ट्रीय अध्यक्षा सोनिया गांधी यांच्या सूचनेनुसार श्री. चव्हाण हे लखनऊला रवाना झाले आहेत. (Prithviraj Chavan News)

कोरोनाच्या पार्श्वभूमीवर निवडणूक आयोगाने व्हर्चुअल पध्दतीने प्रचार यंत्रणेला परवानगी दिली आहे. त्याप्रमाणे सर्व पक्षांचा प्रचार या पाचही राज्यात सुरु आहे. व्हर्चुअल प्रचार तसेच पत्रकार परिषदा अशा काही तंत्रानुसार प्रचार सुरू आहे.

यानुसार तीन राज्यांमध्ये पत्रकार परिषदा घेऊन काँग्रेस पक्षाची भूमिका मांडण्याचे महत्वपूर्ण काम काँग्रेस पक्षाने माजी मुख्यमंत्री पृथ्वीराज चव्हाण यांच्यावर सोपवले आहे. पृथ्वीराज चव्हाण उत्तरप्रदेश, उत्तराखंड व गोवा या राज्यांमध्ये पत्रकार परिषदा घेऊन पक्षाची भूमिका मांडणार आहेत. त्यासाठी ते नुकतेच लखनऊला रवाना झाले आहेत.