Sangli Politics : राजू शेट्टींच्या छुप्या मदतीने जयंत पाटलांची लढाई सोपी? भाजपविरोधी ताकदीला सुरुंग

Sangli Politics : मागील 20 वर्षांपासून वाळवा तालुक्याच्या राजकारणात केंद्रस्थानी असलेले स्वाभिमानी शेतकरी संघटनेचे नेते राजू शेट्टी यावेळी मात्र ईश्वरपूर नगरपालिका निवडणुकीच्या रणधुमाळीत बेदखल होते. कधी काळी त्यांच्याशिवाय जयंत पाटील विरोधकांचे पानसुध्दा हलायचे नाही. पण यावेळी ते आष्टा-ईश्वरपूरच्या राजकारणापासून लांबच राहिले आहेत. जयंत पाटील यांच्यासोबत विधानसभा निवडणुकीनंतर पुन्हा जुळलेला दोस्ताना यामागे कारणीभूत असल्याचे बोलले जाते.

शेट्टींनी राज्यातील साखर कारखानदारांना लक्ष्य करीत स्वतःची राज्यव्यापी ओळख तयार केली. निवडणुकीच्या राजकारणात दोन वेळा खासदारकी पटकावत यश मिळवले. आज ते राज्यातील शेतकऱ्यांचे आघाडीचे नेते आहेत. त्यांच्या हातकणंगले लोकसभा मतदारसंघाचा भाग राहिलेल्या वाळवे तालुक्यात त्यांनी आपले राजकीय बस्तान बसवले होते. त्यासाठी त्यांनी जयंत पाटील यांना लक्ष्य केले. जयंतविरोधकांचे ते मार्गदर्शक झाले. शेट्टी यांनी कायमच जयंत विरोधकांना सोबत घेऊनच राजकारण केले.

गत नगरपालिका निवडणुकीवेळी निशिकांत पाटील यांना जयंत पाटील यांच्यापासून फोडून त्यांनी विकास आघाडीची मोट बांधत जयंतरावांच्या बालेकिल्ल्यात विजयश्री खेचून आणली. त्यावेळी नानासाहेब महाडिक व आमदार सदाभाऊ खोत यांची मोट बांधत त्यांनी उमेदवार ठरवण्यापासून प्रचाराच्या सर्वच आघाड्यांवर किल्ला लढवला. विरोधकांसाठी तेव्हा शेट्टींचा शब्द प्रमाण होता. यावेळी मात्र ते कुठेच चित्रात दिसले नाहीत. त्यांचे म्हणून असलेले काही कार्यकर्तेही दिसले नाहीत.

राजू शेट्टी यांचे एकेकाळचे सहकारी सदाभाऊ खोत पुरते भाजपचे आमदार आणि उजवे हात झाले आहेत. शेट्टींचे त्यांच्याशी विळ्या-भोपळ्याचे सख्य आहे. मोठ्या वाक् युद्धानंतर आता त्यांच्यात आता मौनातील फारकत झाली आहे. शेट्टींनीही तालुक्यात संपर्क कमी केला आहे. काहीकाळ त्यांचा जयंतरावांशी घरोबा होता. पण लोकसभेवेळी त्यांनी काडीमोड घेतला. विधानसभा निवडणुकीत महाविकास आघाडीचा दारूण पराभव झाल्यानंतर पुन्हा शेट्टी आणि जयंत पाटील यांच्यात गट्टी जमली आहे.

सलग दोनवेळा लोकसभेला झालेला दारुण पराभव, स्वाभिमानी शेतकरी संघटनेची ऊसदराबाबत कमी झालेली आक्रमकता यामुळे त्यांची ताकद घटली आहे. संघटनेचा स्वतंत्र गट बांधून ठेवण्याचा प्रयत्न होताना दिसत नाही. मोजकेच व सर्वसामान्य कार्यकर्ते शेट्टींसोबत राहिले आहेत. यापूर्वी कोणत्याही निवडणुकीत शेट्टी वाळवा तालुक्यात तळ ठोकायचे. मात्र गेल्या दोन महिन्यांत त्यांनी कोणालाच साद घातली नाही. तेही फिरकले नाहीत. पण याचा थोडा का होईना पण फायदा जयंत पाटील यांना दोन्ही नगरपालिकांमध्ये होण्याची शक्यता आहे.