Solapur Loksabha constituency : सोलापूरसाठी भाजपकडून राम सातपुते फायनल; दोन युवा आमदारांमध्ये होणार लढत

Solapur, 22 March : सोलापूर लोकसभा मतदारसंघासाठी भारतीय जनता पक्षाकडून माळशिरसचे आमदार राम सातपुते यांचे नाव निश्चित झाले असून, पक्षाच्या पुढील यादीत त्यांच्या नावाची घोषणा होईल, अशी माहिती विश्वसनीय सूत्रांकडून मिळाली आहे. अनेक नावांचा विचार करून पक्षश्रेष्ठींनी निवडून येण्याच्या निकषावर आमदार सातपुते यांचे नाव फायनल केल्याची माहिती आहे.

काँग्रेसकडून सोलापूरसाठी आमदार प्रणिती शिंदे (Praniti Shinde) यांचे नाव गुरुवारी रात्री जाहीर झाले आहे. त्यामुळे प्रणिती शिंदे यांच्याविरोधात कोण असणार, याची उत्सुकता सोलापूरमध्ये असतानाच आमदार सातपुते (Ram Satpute) यांचे नाव भाजपकडून फायनल करण्यात आल्याची माहिती आहे. उपमुख्यमंत्री देवेंद्र फडणवीस यांनी दोन दिवसांपूर्वीच राम सातपुते यांच्याशी चर्चा करून त्यांना सोलापूरच्या (Solapur) रणांगणात उतरण्यासाठी राजी केल्याचे सांगण्यात येत आहे.

दरम्यान, सोलापूर लोकसभा मतदारसंघासाठी माजी खासदार अमर साबळे, शरद बनसोडे, पद्मश्री मिलिंद कांबळे यांच्यापासून स्थानिक माजी नगरसेवकांपर्यंत अनेक नावांची चर्चा झाली. मात्र, आमदार प्रणिती शिंदे यांच्याशी टक्कर देणारा उमेदवार म्हणून अगदी पहिल्या दिवसापासून राम सातपुते यांचे नाव आघाडीवर होते.

आमदार सातपुते हे सोलापूर लोकसभेची निवडणूक लढविण्यासाठी फारसे इच्छुक नव्हते. तसे त्यांनी पक्षश्रेष्ठींच्या कानावरही घातले होते. त्यामुळे गेली काही महिन्यांपासून चर्चेत असलेल्या राम सातपुते यांची उमेदवारी घोषित होऊ शकली नव्हती. मात्र, पक्षाचा ‘चारशे पार’ चा नारा प्रत्यक्षात आणण्यासाठी भाजपला एकेक जागा महत्त्वाची आहे, त्यातून आमदार सातपुते यांची उमेदवारी पुढे आली आहे.

सोलापूर लोकसभा मतदारसंघातील सोलापूर शहर उत्तर, शहर मध्य, दक्षिण सोलापूर, अक्कलकोट, मोहोळ, पंढरपूर-मंगळवेढा या सहा विधानसभा मतदारसंघांपैकी पाच मतदारसंघांत महायुतीचे आमदार आहेत. अवघ्या एका मतदारसंघात काँग्रेसचा आमदार आहे, त्यामुळे कागदावर जरी महायुती बलाढ्य वाटत असली तरी प्रत्यक्षात ‘ग्राउंड लेव्हल’वर परिस्थिती काहींशी वेगळी आहे, त्यामुळे सोलापूर मतदारसंघात दोन्ही युवा आमदारांमध्ये तुल्यबळ लढत होण्याची शक्यता आहे.

R