Sabhapati Aarakshan : पंचायत समिती सभापतिपद आरक्षण : माढा, माळशिरस, दक्षिण सोलापूरचे सभापतिपद खुले; महिलांना सहा ठिकाणी संधी

1. सोलापूर जिल्ह्यातील अकरा पंचायत समित्यांच्या सभापतीपदाचे आरक्षण जाहीर झाले असून, महिलांसाठी ५० टक्के (६ सभापतिपदे) राखीव ठेवण्यात आली आहेत.

2. माढा, माळशिरस आणि दक्षिण सोलापूर या तीन पंचायत समित्यांचे सभापतीपद सर्वसाधारण (खुले) राहणार आहे.

3. आरक्षणानंतर आता गट आणि गण आरक्षणाकडे तसेच पक्षीय मोर्चेबांधणीच्या तयारीकडे सर्वांचे लक्ष वळले आहे.

Solapur, 10 October : सोलापूर जिल्ह्यातील अकरा पंचायत समित्यांच्या सभापतीचे आरक्षण आज जाहीर करण्यात आले आहे. यामध्ये महिलांसाठी पन्नास टक्के म्हणजेच सहा पंचायत समित्यांचे सभापतिपद आरक्षित झाले आहे. जिल्ह्यातील केवळ माढा, माळशिरस आणि दक्षिण सोलापूर पंचायत समित्यांचे सभापतीपद खुले असणार आहे. त्यामुळे या ठिकाणी सर्वाधिक चुरस असणार आहे. याशिवाय कुणबी मराठा प्रमाणपत्रामुळे ओबीसींच्या जागेवर स्पर्धा दिसणार आहे.

स्थानिक स्वराज्य संस्थांच्या निवडणुका जानेवारी २०२६ पर्यंत घेण्याचे निर्देश सर्वोच्च न्यायालयाने दिले आहेत. त्यानुसार निवडणूक आयोगाने कामाला सुरुवात केली आहे. राज्यातील जिल्हा परिषदेच्या अध्यक्षपदाचे आरक्षण यापूर्वी जाहीर झाले आहे. त्या ठिकाणी निराशा झालेल्या इच्छुकांचे लक्ष पंचायत समितीच्या सभापतीपदाच्या (Panchayat Samiti Sabhapati) आरक्षणाकडे लागले होते.

सोलापूरच्या (Solapur) नियोजन भवनात जिल्ह्यातील अकरा पंचायत समित्यांच्या सभापतीपदाचे आरक्षण काढण्यात आले, त्यानुसार जिल्ह्यातील तीन पंचायत समित्यांचे सभापतिपद हे खुले (सर्वसाधारण प्रवर्ग) असणार आहे. खुल्या प्रवर्गातील महिलांसाठी तीन पंचायत समित्यांचे सभातिपद आरक्षित असणार आहे. तीन पंचायत समित्यांवर ओबीसींना, तर दोन ठिकाण अनुसूचित जाती प्रवर्गाला संधी मिळणार आहे.

सभापतिपदाचे आरक्षण जाहीर झाल्यानंतर आता जिल्हा परिषदेचे गट आणि पंचायत समित्यांचे गणाच्या आरक्षणाचे सर्वांचे लक्ष असणार आहे. जिल्हा परिषद अध्यक्षांपाठोपाठ आता पंचायत समित्यांच्या सभापतिपदाचे आरक्षण जाहीर झाल्याने इच्छुकांच्या मोर्चेबांधणीला वेग येणार आहे. तसेच, राजकीय पक्षांकडूनही तयारीला सुरूवात होण्याची शक्यता वर्तविण्यात येत आहे.

सोलापूर जिल्ह्यातील अकरा पंचायत समित्या आणि सभापतिपदाचे आरक्षण पुढीलप्रमाणे :

अक्कलकोट- ओबीसी महिला

बार्शी - सर्वसाधारण महिला

सांगोला- सर्वसाधारण महिला

करमाळा - ओबीसी महिला

माढा - सर्वसाधारण

पंढरपूर - अनुसूचित जाती सर्वसाधारण

माळशिरस- सर्वसाधारण

मंगळवेढा - सर्वसाधारण महिला

मोहोळ - ओबीसी सर्वसाधारण

दक्षिण सोलापूर - सर्वसाधारण

उत्तर सोलापूर - अनुसूचित जाती (महिला)

प्रश्न 1 : सोलापूर जिल्ह्यात एकूण किती पंचायत समित्यांचे आरक्षण जाहीर झाले?
एकूण ११ पंचायत समित्यांचे सभापतीपदाचे आरक्षण जाहीर करण्यात आले आहे.

प्रश्न 2 : महिलांसाठी किती सभापतिपदे राखीव आहेत?
सहा पंचायत समित्यांचे सभापतिपद महिलांसाठी राखीव ठेवण्यात आले आहे.

प्रश्न 3 : खुले प्रवर्ग कोणत्या पंचायत समित्यांना मिळाले?
माढा, माळशिरस आणि दक्षिण सोलापूर या पंचायत समित्यांना खुले प्रवर्ग देण्यात आला आहे.

प्रश्न 4 : ओबीसी आणि अनुसूचित जाती प्रवर्गासाठी कोणत्या पंचायत समित्या आरक्षित आहेत?
ओबीसी: अक्कलकोट (महिला), करमाळा (सर्वसाधारण), मोहोळ (महिला)

1. अनुसूचित जाती: पंढरपूर (सर्वसाधारण), उत्तर सोलापूर (महिला)