Samtrjeet Ghatge : समरजीत घाटगेंना लागले घरवापसीचे वेध; भाजप प्रवेशासाठी चंद्रकांतदादा काढणार मुहूर्त

Samrjeet Ghatge Ready to join BJP : कागलमधील राष्ट्रवादी काँग्रेस शरदचंद्र पवार पक्षाचे नेते आणि शाहू ग्रुपचे अध्यक्ष समरजीत घाटगे यांचा भाजपप्रवेश जवळपास निश्चित झाला आहे. ऑगस्ट महिन्याच्या दुसऱ्या आठवड्यात त्यांचा पक्षप्रवेश होणार असल्याची माहिती आहे. उच्च आणि तंत्र शिक्षणमंत्री चंद्रकांत पाटील या आठवड्यात कोल्हापूर दौऱ्यावर येणार आहेत. याच दौऱ्यात घाटगे यांच्या प्रवेशाचा मुहूर्त निघणार आहे.

गतवर्षी विधानसभा निवडणुकीत कागल विधानसभा मतदारसंघात महायुतीमधून हसन मुश्रीफ यांना उमेदवारी देण्यात आली होती. त्यानंतर समरजीत घाटगे यांनी भाजपला रामराम ठोकत राष्ट्रवादी शरदचंद्र पवार पक्षात प्रवेश करून निवडणूक लढवली. मात्र पराभव झाल्यानंतर आता समरजीत घाटगे यांना पुन्हा भाजप प्रवेशाचे वेध लागले आहेत. पावसाळी अधिवेशनादरम्यान त्यांनी मुंबईत भाजपच्या वरिष्ठ नेत्यांच्या भेटीगाठीही घेतल्या होत्या.

घाटगे यांचं सहकारात मोठे नाव आहे. शाहू कारखाना, शाहू दूध, शिक्षण संस्था, बँकिंग क्षेत्रात देखील योगदान आहे. केंद्र आणि राज्य सरकारच्या विरोधात राहून सहकारी संस्था सांभाळणे आव्हानात्मक ठरते. सरकार पूरक भूमिका घेणेच अधिक हिताचे असते, असा अनुभव त्यांना मागील काही दिवसात आल्याचे सांगितले जाते.

मुश्रीफ यांना विजयासाठी झुंजवले :

2024 च्या विधानसभा निवडणुकीत घाटगे यांचा पराभव झाला असला तरी त्यांना 1 लाख 33 हजार मते मिळाली. कोल्हापूर जिल्ह्यातील सर्वात जास्त मते मिळवणारे विरोधी पक्षातील ते एकमेव उमेदवार आहेत. याशिवाय मागील विधानसभा निवडणुकीपेक्षा त्यांना यंदा 45 हजार अधिकची मते मिळाली आहेत.

दुसऱ्या बाजूला मुश्रीफ यांना महायुती, माजी खासदार संजय मंडलिक, माजी आमदार संजय घाटगे, लाडकी बहीण योजनेची मदत मिळाली. असे असताना देखील मुश्रीफ यांना कमी मताधिक्य मिळाले. मागील निवडणुकीपेक्षा मंत्री मुश्रीफ हे केवळ 11 हजार मतांनी विजयी झालेत.