खासदारकी संपल्यानंतर माझी दिशा वेगळी असणार; संभाजीराजेंची गुगली

कोल्हापूर : मी राष्ट्रपती नियुक्त खासदार आहे. त्यामुळे 3 मे पर्यंत माझ्या खासदारकीची मुदत आहे. त्यानंतर माझी दिशा वेगळी असणार, अशी गुगली खासदार संभाजीराजे छत्रपती (Sambhaji Raje Chhatrapati) यांनी आज टाकली. त्यांच्या या विधानामुळे राजकीय वर्तुळात चर्चा सुरु झाली आहे.

कोल्हापूर (Kolhapur) उत्तर विधानसभा पोट निवडणुकीसाठी खासदार संभाजीराजे यांनी न्यू पॅलेस परिसरातील मतदान केंद्रावर मतदान केले. यावेळी ते बोलत होते. ते म्हणाले, मी राष्ट्रपती नियुक्त खासदार आहे. माझी सामाजिक कामे सुरु आहेत. माझ्या कामाचा कोण कसा अर्थ काढेल हे मला माहिती नाही. कोणी काय बोलावे, हे मी काय सांगू शकणार नाही. मी माझ्या पध्दतीने प्रामाणिक काम करत असतो. काम करताना मी मागच्या पुढच्याचा विचार करत नाही. माझी पुढची दिशा 3 मे नंतर वेगळी असणार आहे. काय असेल यासाठी आपल्याला थोडे थांबावे लागेल, असेही संभाजीराजे म्हणाले.

त्याच बरोबर मतदान करणे हा लोकशाहीचा अधिकार आहे. सर्वांनी मतदान करावे, मतदानाचा हक्क बजावला पाहिजे. आज बराच विचार करुन मी मतदान केले, असेही ते म्हणाले. मतदान कोणाला करावे यासाठी मला 30 सेकंद लागली. मात्र, मतदान करण्यात आनंद वाटला. व्यक्ति स्वातंत्र्य आहे. किती माणूस मोठा असला तरीही विचारपूर्वक मतदान केले जाते. तसा मीही विचार केला, असेही त्यांनी सांगितले होते.

दरम्यान, 'कोल्हापूर उत्तर' विधानसभा पोटनिवडणुकीसाठी आज मतदान पार पडत आहे. या निवडणुकीसाठी महाविकास आघाडीकडून (Mahavikas Aghadi) काँग्रेसच्या (Congress) जयश्री जाधव (Jayshree Jadhav) रिंगणात आहेत, तर भाजपकडून (BJP) सत्यजित कदम निवडणूक लढवत आहेत. पोटनिवडणूक असली तरीही दोन्ही पक्षांनी प्रतिष्ठेची बनवली आहे.