Satara Bank Election : सातारा जिल्हा बँक निवडणुकीत तोतया निरीक्षकाचा प्रवेश; दहिवडीत पुणेकर महिलेला अटक

Satara News : सातारा जिल्हा मध्यवर्ती बँकेच्या निवडणुकीत दहिवडी येथील मतदान केंद्रावर तोतया निवडणूक निरीक्षक बनून आलेल्या वैशाली अक्षदा देशपांडे (रा. पाषाण-सुस रोड, पुणे) या महिलेला पोलिसांनी अटक केली आहे.

२०२३ मधील निवडणूक आयोगाचे जुने ओळखपत्र गळ्यात अडकवून ती केंद्रावर वावरत असताना, संशयास्पद हालचालींमुळे पोलिसांनी केलेल्या चौकशीत तिचे बिंग फुटले.

सद्यस्थितीत या नावाच्या कोणत्याही निरीक्षकाची नियुक्ती नसल्याचे स्पष्ट होताच, पोलीस हवालदार अजय झुंजार यांच्या फिर्यादीवरून दहिवडी पोलीस ठाण्यात भारतीय न्याय संहिता कलम २०४ आणि २०५ अन्वये गुन्हा दाखल करण्यात आला असून पोलीस पुढील तपास करत आहेत.

सातारा जिल्हा मध्यवर्ती सहकारी बँकेच्या निवडणुकीसाठी रविवारी मतदान पार पडले. १२ जागांसाठी झालेल्या या निवडणुकीकडे संपूर्ण जिल्ह्याचे लक्ष लागले आहे. मंत्री शंभूराज देसाई, मंत्री जयकुमार गोरे यांच्यासह अनेक बड्या नेत्यांची प्रतिष्ठा पणाला लागली आहे.

२१ जागांपैकी ९ जागा यापूर्वीच बिनविरोध झाल्या असून, उर्वरित १२ जागांसाठी आज सकाळी ८ ते सायंकाळी ५ या वेळेत मतदान पार पडले. मतदान प्रक्रिया सुरळीत पार पाडण्यासाठी ११५ कर्मचाऱ्यांची नियुक्ती करण्यात आली आहे. प्रत्येक मतदान केंद्रावर पोलिसांचा मोठा बंदोबस्त तैनात करण्यात आला आहे.

या निवडणुकीत पालकमंत्री शंभूराजे देसाई विरुद्ध सत्यजितसिंह पाटणकर, राज्याचे ग्रामविकास मंत्री जयकुमार गोरे विरुद्ध जिल्हा मध्यवर्ती सहकारी बँकेचे माजी संचालक आणि त्यांचे बंधू शेखर गोरे, रामराजे नाईक निंबाळकर यांचे बंधू संजीव राजे नाईक निंबाळकर विरुद्ध माजी खासदार निंबाळकर रणजितसिंह नाईक निंबाळकर यांचे बंधू समशेरसिंह नाईक निंबाळकर या लढतींकडे राज्याचे लक्ष लागून राहिला आहे.