Shambhuraj Desai News : एकही आमदार नसणाऱ्या आंबेडकरांचे मुख्यमंत्र्यांवरील विधान निंदनीय; शंभूराज देसाईंचा टोमणा

Satara : "मुख्यमंत्री, उपमुख्यमंत्री हेही कंत्राटी पद्धतीने भरायला सुरुवात करा," असा टोला लगावून ही कंत्राटी पद्धत बेकायदेशीर असून, हे सरकारही पूर्णपणे बेकायदा आहे," अशी जहरी टीका वंचित बहुजन आघाडीचे नेते प्रकाश आंबेडकर (Prakash Ambedkar) यांनी राज्यातील सरकारवर केली.

साताऱ्याचे पालकमंत्री शंभूराज देसाईंना आंबेडकरांच्या या विधानाचा समाचार घेतला आहे. महाराष्ट्राच्या विधानभवनात 288 आमदारांपैकी एकही आमदार नसणाऱ्या प्रकाश आंबेडकरांनी बहुमत असलेल्या महायुतीच्या मुख्यमंत्री आणि दोन्ही उपमुख्यमंत्र्यांबाबत केलेले वक्तव्य हे निंदनीय असल्याची टीका केली आहे.

"इंडिया आघाडी न झाल्यास पंतप्रधान नरेंद्र मोदींना फायदा होईल," असे विधानही प्रकाश आंबेडकरांनी केले आहे. त्यावर शंभूराज देसाईंनी निशाणा साधला आहे. "इंडिया आघाडीच्या बैठका झाल्या. त्यात प्रकाश आंबेडकरांना बोलावलं नव्हतं. त्यामुळे स्वतःला स्थान मिळते का याचा विचार त्यांनी करावा. मोदींना फायदा होईल की महायुतीला होईल याचा त्यांनी विचार करू नये," असा टोला त्यांनी लगावला.

वंचित बहुजन आघाडीचे नेते ॲड.प्रकाश आंबेडकर यांनी शनिवारी साताऱ्यात शासकीय विश्रामगृहात पत्रकारांशी संवाद साधला. या वेळी त्यांनी राज्य सरकारच्या भरती प्रक्रियेवर टीका केली. ते म्हणाले, "महाराष्ट्रात खासगीकरणाची सुरुवात झाली असून, मुख्यमंत्री एकनाथ शिंदे , उपमुख्यमंत्री देवेंद्र फडणवीस, उपमुख्यमंत्री अजित पवार यांच्यापेक्षा अधिक क्षमता व नैतिकता असणारी अनेक माणसे आहेत,"

"नोकर भरती करण्याचा अधिकार हा पंतप्रधान आणि मुख्यमंत्र्यांनाही नाही. हा अधिकार लोकसेवा आयोगाला आहे. सरकारला कोणता आयोग ते ठरविण्याचा अधिकार आहे. निवडण्याचा नाही. हा अधिकारी राष्ट्रपती आणि राज्यपालांनाच आहे, असे आंबेडकर म्हणाले.