Satara ZP : साताऱ्यात भाजपचं गर्वहरण! सत्तेसाठी शिवेंद्रराजे, जयकुमार गोरेंना शंभूराज देसाईंच्या बंगल्याच्या पायऱ्या चढाव्याच लागणार!

Satara ZP : जिल्हा परिषद निवडणुकीच्या प्रचारादरम्यान पालकमंत्री कोणीही असूदे असे म्हणत ग्रामविकास मंत्री जयकुमार गोरे यांनी पालकमंत्री शंभूराज देसाई यांना अनेकदा डिवचले. परंतु, जिल्ह्यातील मतदारांनी दिलेले कौल पाहता जिल्हा परिषदेवर सत्ता मिळवण्यासाठी शंभूराज देसाई यांचीच भूमिका महत्वाची बनली आहे. निवडणुकीदरम्यान त्यांच्या कोयना दौलत निवासस्थानात राष्ट्रवादी व शिवसेनेची बैठक लक्षवेधी ठरली होती. आता अध्यक्षपदाच्या निवडीतही कोयना दौलतवरील रणनितीच निर्णायक ठरणार आहे.

जिल्हा परिषदेचे एकुण ६५ गट आहेत. त्यामुळे बहुमत गाठण्यासाठी ३३ जागांची गरज आहे. भाजपला केवळ २७ जागांवर विजय मिळवता आला आहे. दुसरीकडे राष्ट्रवादीचे २०, शिवसेनेचे १५, काँग्रेसचा एक, स्वाभिमानी पक्षाचा १ असे ३७ चे संख्याबळ होते. बहुमतासाठी भाजपला अजून ६ सदस्यांची गरज आहे. थोडक्यात भाजपला स्वबळावर जिल्हा परिषदेची सत्ता मिळवण्यापासून रोखण्यात राष्ट्रवादी व शिवसेनेला यश आले आहे.

स्वबळाबवर सत्ता मिळविण्यासाठी भाजपने निवडणुकीच्या सुरवातीपासून महायुतीमधील घटक पक्षांना डावलण्याचे काम केले. किंबहूना या पक्षांच्या विरोधातच आक्रमक भूमिका घेतली. शंभूराज देसाई यांनी बोलावलेल्या महायुतीच्या बैठकीला भाजपचा वरिष्ठ नेत्यांनी पाठ दाखविली होती. त्याला प्रत्यत्तर म्हणून मंत्री देसाई यांनी त्यांच्या कोयना दौलत या निवासस्थानी राष्ट्रवादी काँग्रेसचे नेते मदत आणि पुनवर्सन मंत्री मकरंद पाटील, खासदार नितीन पाटील, विधान परिषदेचे माजी सभापती रामराजे नाईक निंबाळकर यांची महत्वपूर्ण बैठक केली. यामध्ये जिल्हा परिषदेची निवडणूक एकत्रित लढण्याचा निर्णय झाला. त्यानुसार मतदार संघनिहाय लढती ठरविण्यात आल्या. त्याचे पडसाद जिल्हा परिषद निवडणुक निकालामध्ये उमटले आहेत.

भाजपमधून निलंबीत केलेले रामकृष्ण वेताळ यांच्या पत्नी अपक्ष म्हणून निवडून आल्या आहेत. पक्षीय चिन्हावर निवडून आले असले तरी, शिवसेनेचे कोरेगावमधील २ सदस्य भाजपशी जवळीक असणाऱ्या महेश शिंदे यांना मानणारे आहे. तसेच फलटणमधील राष्ट्रवादीचा एक सदस्य भाजपसोबत युतीकरून निवडणुकीला सामोरे गेलेला आहे. यांनी भाजपला मदत करायची ठरवली आणि वेताळांनी पक्षाला साथ दिली तरीही चारच सदस्यांची गोळाबेरीज होत आहे.

त्यात पक्षीय व्हिपची अडचण आहे ती वेगळीच. त्यामुळे शिवसेनेच्या पाठींब्याशिवाय भाजप सत्तेत जाऊ शकत नाही. त्याची सूत्रे मंत्री देसाई यांच्या हातात आहेत. दुसरीकडे मंत्री पाटील आधीपासूनच मंत्री देसाईंशी संधान बांधून आहेत. त्याला सध्या शिवसेनेत असलेले माजी विधानपरिषद सभापती रामराजे नाईक-निंबाळकर यांची साथ असणार आहे. त्यामुळे जिल्हा परिषदेवरील सत्तेची वाट कोयना दौलतवरील वाटाघाटी व रणनितीवर अवलंबून राहणार आहे.