Satara ZP : "सातारचे पोलीस सत्तेसाठी गोळ्या घालायलाही कमी पडणार नाहीत" : भाजप पदाधिकाऱ्याकडूनच पक्षाचे वाभाडे; पदावरून तातडीने हटवलं

सातारा जिल्हा परिषदेच्या सत्तास्थापनेत भारतीय जनता पक्षाने लोकशाहीचा गळा घोटून सत्ता मिळविल्याची चर्चा सर्वत्र आहे. याचे पडसाद सोमवारी (23 मार्च) विधानसभा आणि विधानपरिषदेतही उमटले. सातारा जिल्हा पोलीस प्रशासनाने मतदान प्रक्रियेत केलेला हस्तक्षेप, मंत्री शंभुराज देसाई, मंत्री मकरंद पाटील यांना झालेली धक्काबुक्की हे स्वतः त्यांनी दोन्ही सभागृहात सांगितले.

पण या घटनेनंतर एक कॉल रेकॉर्डिंग व्हायरल झाले आहे. भाजपचे जिल्हा सरचिटणीस संतोष कणसे यांचे हे रेकॉर्डिंग असल्याचे सांगितले जात. यात पोलिसांचा सत्तास्थापनेत कसा चुकीच्या पद्धतीने वापर झाला, यावर भाष्य केले गेले. त्या रेकॉर्डिंगनंतर भाजपने पक्षशिस्तीचे उल्लंघन केल्याचे सांगत तत्काळ कणसे यांच्यावर कारवाई केली आहे. त्यांची जिल्हा सरचिटणीस पदावरून हकालपट्टी झाली आहे.

झेडपीतील सत्तास्थापनेनंतर कणसे यांनी पुणे जिल्ह्यातील एका दुसऱ्या पक्षाच्या पदाधिकाऱ्यासोबत फोनवर निवडणुकीबाबत चर्चा केली. या चर्चेवेळी त्यांनी सर्व घटनाक्रम सांगितला. नीतिमत्ता बाजूला ठेवत पोलिस यंत्रणेला हाताशी धरून सत्ता स्थापन केल्याचा गंभीर आरोप या संभाषणात करण्यात आला. झेडपी सदस्य फोडण्यासाठी पोलिसांना सुपारी दिली असून, हे घाणेरडे राजकारण सुरू झाले आहे.

सहा सदस्य भाजपने फोडून सत्ता स्थापन केली, तसेच मंत्री शंभूराज देसाई, मकरंद पाटील यांना यांना धक्काबुक्की होण्याचे प्रकारघडत असल्याने राजकारण कुठल्या थराला गेल्याचे सांगत हे पटले नसल्‍याची खंतच जणू व्‍यक्‍त केली. तसेच पुढच्या वेळी पोलीस प्रशासन सत्तेसाठी विरोधी सदस्यांना गोळ्या घालायलाही कमी करणार नाही, अशी चिंता बोलून दाखवली.

हे रेकॉर्डिंग व्हायरल झाल्यानंतर भाजपने कणसे यांच्यावर कारवाई केली आहे. त्यांची जिल्हा सरचिटणीस पदावरून हकालपट्टी झाली आहे. पण या कारवाईनंतर जिल्हा परिषद सत्तास्थापनेची पारदर्शकता, प्रशासनाची भूमिका आणि भाजपने पदाधिकाऱ्यावर केलेल्या कारवाईमुळे समाज माध्यमावर चर्चांना उधाण आले होते.