Satyajeet Kadam : सत्यजित कदमांची वेगळी चूल? विसर्जन मिरवणुकीत दिसली भाजपमधील दुफळी?

आगामी विधानसभा निवडणुकीच्या तोंडावर कोल्हापूर उत्तर विधानसभा मतदारसंघात भाजपमध्ये दुफळी निर्माण झाल्याचे चित्र गणेश विसर्जन मिरवणुकीत पाहायला मिळाले. विसर्जनाच्या स्वागत बूथवरून भाजपमधील (BJP) दुफळी अधोरेखित झाली आहे. कोल्हापूर उत्तर विधानसभा निवडणुकीतील इच्छुक उमेदवार आणि मागील पोट निवडणुकीत भाजपचे उमेदवार असलेले सत्यजित कदम यांनी भाजप बूथला लागूनच स्वतंत्र बूथ केल्याने कोल्हापूर उत्तर मधील भाजपमध्ये मतभेद समोर आले आहेत. पक्षामध्येही काही अंतर्गत वादामुळे कार्यकर्ते पदाधिकाऱ्यांपासून दुरावले असल्याचे चित्र दिसून येत आहे.

आगामी विधानसभा निवडणुकीच्या पार्श्वभूमीवर भाजपमधील नेत्यांनी कंबर कसली आहे. महाविकास आघाडी कोल्हापुरात (Kolhapur) तुल्यबळ ठरत असताना भाजपमधील नेत्यांनी एकत्रपणे काम केले पाहिजे अशा सक्त सूचना केंद्रीय स्तरासह राज्य पातळीवरून जिल्ह्यातील नेत्यांना देण्यात आल्या आहेत. अशातच कोल्हापूर उत्तर विधानसभा मतदारसंघात भाजपकडून अनेक इच्छुक उमेदवार उमेदवारीसाठी प्रयत्न करत आहेत. त्यावरूनच या मतदारसंघातील भाजपमधील दुफळी ऐन गणेश विसर्जन मिरवणुकीत स्वागत कक्षावरून दिसून आली. मिरवणुकीत गणेश मंडळांशी संपर्क करण्यासाठी स्वागत कक्ष उभारले जातात. येथे मिरवणुकीतील मंडळाच्या अध्यक्षाला नारळ, पान, सुपारी देऊन सन्मानित केले जाते. यासाठी प्रत्येक राजकीय पक्ष स्वागत कक्ष उभारतात.

कोल्हापूर शहरात असणारा गंगावेश येथे भाजपकडून स्वागत कक्ष उभारण्यात आला होता. तर त्याच बाजूला भाजपमधील पोटनिवडणुकीतील उमेदवार आणि सध्या आगामी विधानसभा निवडणुकीला इच्छुक असलेले सत्यजित उर्फ नाना कदम (satyajeet kadam) यांनी देखील स्वागत कक्ष उभारलेला पाहायला मिळाला. त्यांनी वेगळा कक्ष उभारल्याने पक्षातील अंतर्गत मतभेद उघड झाले आहेत. कोल्हापूर शहरातील भाजपमध्ये महाडिक गटाची एन्ट्री झाल्यानंतर पक्षांमध्ये जुना आणि नव्या कार्यकर्त्यांमध्ये वाद सुरू आहेत. अशातच कदम यांनी स्वागत कक्ष उभारल्यानंतर अंतर्गत वाद पुन्हा एकदा चव्हाट्यावर आला आहे. ऐन निवडणुकीच्या पार्श्वभूमीवर पक्षातील मतभेद पुढे आल्याने आता नेत्यांना मध्यस्थाची भूमिका बजावी लागणार आहे.

2014 पासून मी कोल्हापूर शहरासह परिसरातील गणपती विसर्जन करणाऱ्या सार्वजनिक तरुण मंडळाचा सत्कार करत असतो. त्यामुळे मी या ठिकाणी स्वागत कक्ष उभारत असतो. कोरोना काळात मी दोन वर्ष स्वागत कक्ष उभारला नव्हता. यंदा हा स्वागत कक्ष उभारला आहे. त्यामुळे भाजपमध्ये मतभेद आहेत असे काही नाही. आम्ही सर्वच एकत्र आहोत. कोणीतरी ठरवून अशा बातम्या घडवून आणत आहे. अशी प्रतिक्रिया सत्यजित कदम यांनी 'सरकारनामा'शी बोलताना दिली आहे.

मनसेत ही दुफळी

कोल्हापूर जिल्ह्यात महाराष्ट्र नवनिर्माण सेनेतही या निमित्ताने दुफळी पाहायला मिळाली. महाराष्ट्र नवनिर्माण सेनेचे पदाधिकारी राजू जाधव (Raju jadhav) यांनी देखील स्वतंत्र स्वागत कक्ष उभारला होता. तर जिल्हाध्यक्ष राजू दिंडोर्ले यांनी देखील स्वतंत्रपणे स्वागत कक्ष उभारला होता. त्यामुळे मनसेमधील अंतर्गत वाद देखील चव्हाट्यावर आले आहे.