Sharad Pawar Rally News : ...तर शरद पवार यांच्या सभेच्या आजूबाजूचे रस्ते बंद करा!

हर्षल बागल -

Sharad Pawar Rally News : माढा परिसरात राष्ट्रवादी काँग्रेसचे अध्यक्ष शरद पवारांच्या सभेला कापसेवाडी येथे थोड्याच वेळामध्ये सुरुवात होणार आहे. सभा कापसेवाडी येथे द्राक्ष बागांच्या परिसरात होत असल्याने सभेच्या नियोजनाचा बोजवारा उडण्याची शक्यता आहे. आयोजकांकडून सभा मोठ्या मैदानात न घेता द्राक्षबागेच्या मधोमध घेण्यात येत आहे, त्यामुळे जागेच्या अभावामुळे सभेला गर्दी होण्याची दाट शक्यता असून, पोलिसांची चांगलीच दमछाक होणार आहे. (Latest Marathi News)

सभास्थळ भरल्यानंतर गर्दी पाहून आजूबाजूचे येणारे रस्ते पोलिसांनी बंद करावेत. जमणाऱ्या गर्दीची शक्यता पाहता पोलिसांनी आधीच खबरदारीचे पाऊल उचलले आहे. सभास्थळ छोटे असल्याने सभेचं नियोजनावर ताण येण्याची शक्यता आहे. त्यामुळे सभेसाठी उपस्थित राहणाऱ्या राष्ट्रवादीच्या पदाधिकाऱ्यांना पद विचारूनच आत मध्ये सोडावे, अशा काही सूचना आयोजकांनी पोलिसांना दिल्याची माहिती सूत्रांची आहे.

माढा परिसरातून येणाऱ्या सर्वसामान्य कार्यकर्त्यांना याचा फटका बसू शकतो. सभेच्या अगोदर एक तास गर्दी पाहून रस्ते बंद करण्याच्या सूचना आयोजकांनी पोलिसांना दिल्यामुळे पोलिसांचीदेखील मोठी कसरत होण्याची शक्यता आहे. राष्ट्रवादी काँग्रेस पक्षाच्या अध्यक्षाची सभा कापसेवाडीत होत असताना तालुक्यातील कोणत्याही पदाधिकाऱ्याला विचारात न घेतल्याचेही चर्चा पक्षाच्या अंतर्गत पदाधिकारी व कार्यकर्त्यांमध्ये होताना दिसत आहे.

(Edited By - Chetan Zadpe)