Solapur DCC Bank : ऐन दिवाळीत रंगणार सोलापूर डीसीसीची निवडणूक; सोमवारी प्रारुप, तर 14 ऑक्टोबरला अंतिम मतदार यादी प्रसिद्ध होणार

Solapur, 20 September : सोलापूर जिल्हा मध्यवर्ती सहकारी बँकेच्या निवडणूक प्रक्रियेला आता वेग आला आहे. ‘डीसीसी’च्या प्रारूप मतदार यादीचा मुहूर्त ठरला असून २१ सप्टेंबर रोजी प्रारुप मतदारयादी प्रसिद्ध होणार आहे. या यादीवर २१ ते ३० सप्टेंबरपर्यंत आक्षेप व हरकती नोंदविण्याची मुदत असणार आहे. घेण्यात आलेले आक्षेप आणि हरकतींवर ९ ऑक्टोबरपर्यंत निर्णय होणार असून, त्यानंतर १४ ऑक्टोबरला अंतिम मतदार यादी प्रसिद्ध केली जाणार आहे. त्यामुळे ऐन दिवाळीत सोलापूर ‘डीसीसी’ बॅंकेची निवडणूक रणधुमाळी रंगणार आहे.

मुंबई उच्च न्यायालयाच्या कोल्हापूर सर्किट बेंचने २४ जुलै २०२६ रोजी दिलेल्या आदेशानुसार सोलापूर जिल्हा मध्यवर्ती सहकारी बँकेच्या संचालक मंडळाच्या निवडणुकीचा कार्यक्रम जाहीर करण्याचे आदेश देण्यात आले आहेत. त्यानुसार महाराष्ट्र सहकारी संस्था अधिनियम १९६०, त्याखालील नियम १९६१ तसेच महाराष्ट्र सहकारी संस्था (समितीची निवडणूक) नियम २०१४ मधील नियम ९ ते ११च्या तरतुदीनुसार मतदार यादीची प्रक्रिया सुरू करण्यात आली आहे.

निवडणुकीसाठी १ जुलै २०२६ हा अर्हता दिनांक निश्चित करण्यात आला आहे, त्यानुसार १३ ऑगस्ट ते ११ सप्टेंबर २०२६ या कालावधीत प्रतिनिधींचे ठराव मागविण्यात आले होते. प्राप्त ठरावांच्या आधारे प्रारूप मतदार यादी तयार करण्यात आली आहे.

प्रारूप यादी जिल्हा सहकारी निवडणूक अधिकारी तथा विभागीय सहनिबंधक, सहकारी संस्था, पुणे विभाग यांच्या कार्यालयासह सोलापूर जिल्हा मध्यवर्ती सहकारी बँकेचे मुख्य कार्यालय, जिल्हा उपनिबंधक कार्यालय, तसेच जिल्ह्यातील संबंधित तालुका सहकारी निवडणूक अधिकारी व उपनिबंधक/सहाय्यक निबंधक कार्यालयात पाहण्यासाठी उपलब्ध राहणार आहे. राज्य सहकारी निवडणूक प्राधिकरणाच्या संकेतस्थळावरही ती प्रसिद्ध केली जाणार आहे.

महत्त्वाचे टप्पे

२१ सप्टेंबर : प्रारूप मतदार यादी प्रसिद्ध

२१ ते ३० सप्टेंबर : आक्षेप व हरकती स्वीकारणे

९ ऑक्टोबर २०२६ : आक्षेपांवर निर्णयाची अंतिम तारीख

१४ ऑक्टोबर २०२६ : अंतिम मतदार यादी प्रसिद्ध