Mohite Patil : अकलूजमध्ये राजकारण तापले; मोहिते पाटलांच्या सभेवर बालेकिल्ल्यातच दगडफेक

1. अकलूज नगरपरिषदच्या पहिल्या निवडणुकीत भाजप विरुद्ध मोहिते पाटील असा थेट संघर्ष निर्माण झाला असून वातावरण तंग झाले आहे.

2. मोहिते पाटील यांच्या पॅनेलच्या सभेवर रात्री दगडफेक झाली, दोघे जखमी झाले, आणि आरोप-प्रत्यारोपांनी राजकीय तापमान वाढवले आहे.

3. दगडफेकीनंतर शीतलदेवी मोहिते पाटील यांच्या सभेत वीज गेली तरी त्यांनी मोबाईल टॉर्च उजेडात भाषण सुरू ठेवून निर्धार व्यक्त केला.

Solapur, 30 November : अकलूज नगरपरिषदेच्या पहिल्याच निवडणुकीत भाजप आणि मोहिते पाटील हे आमने सामने आले आहेत. दोन्ही बाजूंकडून निकराची लढाई सुरू आहे. मात्र, अकलूज नगरपरिषदेच्या निवडणुकीला गालबोट लागले असून मोहिते पाटील यांच्या पॅनेलच्या सभेवर शुक्रवारी रात्री उशिरा दगडफेक झाली आहे. त्यात दोघे किरकोळ जखमी झाले आहेत. त्यानंतर शीतलदेवी मोहिते पाटील यांच्या भाषणावेळी वीज गेल्याने काहीसा गोंधळ उडाला, त्यामुळे अकलूजमध्ये राजकीय वातावरण चांगलेच तापले आहे.

अकलूज नगरपरिषदेची पहिलीच निवडणूक होत असून या निवडणुकीत भाजपने माजी आमदार राम सातपुते (Ram Satpute) यांच्या नेतृत्वाखाली स्वतंत्र पॅनेल उभे केले आहे. त्यांना पालकमंत्री जयकुमार गोरे यांची साथ आहे, त्यामुळे भाजपने मोहिते पाटील यांच्या बालेकिल्ल्यात आव्हान उभे केले आहे दुसरीकडे, धवलसिंह मोहिते पाटील यांच्या नेतृत्वाखाली राष्ट्रवादी काँग्रेस पक्षाचा पॅनेलही निवडणुकीच्या रिंगणात आहे.

खासदार धैर्यशील मोहिते पाटील (Dhairyasheel Mohite Patil ) यांच्या नेतृत्वाखाली राष्ट्रवादी काँग्रेस शरदचंद्र पवार पक्षाचे पॅनेल संपूर्ण ताकदीने लढत आहे. त्या पॅनेलची अकलूजच्या आझाद चौकात रात्री साडेआठच्या सुमारास सभा होती. ती सभा सुरू असताना अचानपणे दगडफेक सुरू झाली. त्या दगडफेकीत दोघे जखमी झाली आहेत. सारिका गायकवाड आणि मोसीन शेख अशी त्यांची नावे आहेत.

माेहिते पाटील यांच्या बालेकिल्ल्यात त्यांच्याच पॅनेलच्या सभेवर दगडफेक झाल्याने आश्वर्य व्यक्त केले जात आहे. या दगडफेकीनंतर अकलूजमधील वातावरण तापले आहे. आरोप-प्रत्यारोपाच्या फैरी झडत आहेत. मोहिते पाटील यांच्याकडून दगड मारले तरी आम्ही मागे हटणार नाही. उद्या काय होणार, याचा हा ट्रेलर आहे, असा आरोप भाजपवर करण्यात आला.

दरम्यान, दगडफेकीनंतर शीतलदेवी मोहिते पाटील यांनी आझाद चौकात सभा घेतली. त्यांच्या भाषणावेळी वीज गेल्याने गोंधळ उडाला. त्यावेळी शीतलदेवी यांनी खरं तर तीन सभांमध्ये बोलून आल्यानंतर या सभेत मी बोलणार नव्हते. पण, दगड पडल्यामुळे घाबरलो असे वाटू नये; म्हणून मी आता बोलत आहे. दगडाला सावित्रीमाई आणि रमाई घाबरली नाही. तर आम्ही का घाबरावं? लाडक्या बहिणी म्हणता मग लाडक्या बहिणींवर दगडं का पडायला लागले आहेत, असा सवालही त्यांनी विचारला.

शीतलदेवी मोहिते पाटील यांचे भाषण सुरू असतानाच वीज गेली, त्यामुळे काही वेळ गोंधळ झाला. मात्र, शीतलदेवींनी कार्यकर्त्यांना शांत राहण्याचे आवाहन केले. त्यांनी मोबाईल टॉर्च उजेडात आपली सभा सुरू ठेवली. दगड पडले, लाईट गेली तरी सभा सुरू राहील, असे ठणकावून सांगितले.

अकलूज नगरपरिषदेच्या निवडणुकीत कोण आमनेसामने आहेत?
→ भाजप (राम सातपुते गट) आणि मोहिते पाटील गट (राष्ट्रवादी शरद पवार) आमनेसामने आहेत.

2) दगडफेकीत किती लोक जखमी झाले?
→ दोन जण किरकोळ जखमी झाले आहेत.

3) सभेत वीज का गेली?
→ अचानक वीज गेल्याने गोंधळ झाला, कारण अद्याप स्पष्ट नाही.

4) दगडफेकीनंतर सभा सुरू ठेवण्याचा निर्णय कोणी घेतला?
→ शीतलदेवी मोहिते पाटील यांनी टॉर्चच्या उजेडात सभा सुरू ठेवली.