Solapur Politic's : वंचितमुळे सुशीलकुमार शिंदेंना घरी बसावं लागलं; तर प्रणितींनी आमचा उमेदवारच चोरला : सुजात आंबेडकरांची टीका

Solapur, 23 June : वंचित बहुजन आघाडीमुळे काँग्रेसचे ज्येष्ठ नेते तथा माजी केंद्रीय गृहमंत्री सुशीलकुमार शिंदे यांना घरी बसावे लागले. वंचित बहुजन आघाडीमुळे काही बिघडत नाही असे खासदार प्रणिती शिंदे म्हणत होत्या. मात्र, असं काय घडलं की, लोकसभेच्या निवडणुकीत त्यांना वंचित बहुजन आघाडीचा उमेदवार चोरावा लागला, अशी घाणाघाती टीका सुजात आंबेडकर यांनी सुशीलकुमार शिंदे आणि प्रणिती शिंदे यांच्यावर केली.

वंचित बहुजन आघाडीच्या वतीने सोमवारी (ता. 23 जून) वाढीव 76 लाख मतदाराच्या विरोधात जनआक्रोश मोर्चाचे आयोजन करण्यात आले होते. त्या मोर्चात बोलताना वंचितचे युवा नेते सुजात आंबेडकर यांनी खासदार प्रणिती शिंदे आणि माजी केंद्रीय मंत्री सुशीलकुमार शिंदेंवर (Sushilkumar Shinde) जोरदार टीकास्त्र सोडले.

मागील 2024 च्या लोकसभा निवडणुकीत सोलापूर मतदारसंघातून वंचित बहुजन आघाडीच्या उमेदवाराने माघार घेत काँग्रेस उमेदवार प्रणिती शिंदे (Praniti Shinde) यांना पाठिंबा जाहीर केला होता. त्यानंतर काही दिवसांतच त्या उमेदवाराने थेट काँग्रेस पक्षात प्रवेश केला होता. तो राहुल गांधी यांच्या सभेत काँग्रेसच्या स्टेजवर होता. त्यावरून वंचित बहुजन आघाडीचे युवा नेते सुजात आंबेडकर यांनी काँग्रेसवर विशेषतः प्रणिती शिंदेंवर उमेदवार चोरल्याचा आरोप केला होता.

वंचित बहुजन आघाडी सत्तेत आल्यास काँग्रेस आणि राष्ट्रवादी काँग्रेस पक्ष संपेल, अशी भीती या पक्षाच्या नेत्यांना होती, त्यामुळे यापूर्वी ज्यांनी संविधान हातात घेतले नाही, त्या काँग्रेसच्या नेत्यांनी आणि खासदार प्रणिती शिंदे यांनीही हातात संविधान घेतले. त्यांनी वंचितचा अजेंडा चोरला. आंबेडकरी चळवळीवरही घाला घातला, असा आरोप सुजाता आंबेडकर यांनी केला.

विधानसभा निवडणुकीत वाढलेले 76 लाख मतदान आले कुठून, याचा निवडणूक आयोगाने डेटा द्यावा. स्थानिक स्वराज्य संस्थेच्या निवडणुका मतपत्रिकेवर घेण्यात याव्यात. अनुसूचित जाती जमातीचा निधी इतरत्र वळवला जाऊ नये, यासाठी कायदा करावा. अनुसूचित जाती जमातीच्या निधी संदर्भात राज्य सरकारने श्वेतपत्रिका काढावी, आदी मागण्यांचे निवेदन जिल्हाधिकाऱ्यांना देण्यात आले.