Solapur, 13 June : स्थानिक स्वराज्य संस्थांच्या आगामी निवडणुकीच्या पार्श्वभूमीवर राष्ट्रवादी काँग्रेस शरदचंद्र पवार पक्षाने पक्षसंघटनेत भाकरी फिरविण्याचा निर्णय घेतला आहे. पक्षाच्या सोलापूर जिल्हाध्यक्षपदी पंढरपूर तालुक्यातील मोहिते पाटील यांचे कट्टर समर्थक आणि जिल्हा परिषदेचे माजी सदस्य वसंतराव देशमुख यांची निवड करण्यात आली आहे. माजी उपमुख्यमंत्री विजयसिंह मोहिते पाटील यांच्या हस्ते देशमुख यांना नियुक्तीचे पत्र देण्यात आले आहे.
वसंतराव देशमुख (Vasantrao Deshmukh) यांना सोलापूरच्या राजकारणात मोहिते पाटील यांचे कट्टर समर्थक म्हणून ओळखले जाते. स्थानिक स्वराज्य संस्थांच्या निवडणुकीच्या पार्श्वभूमीवर राष्ट्रवादी काँग्रेस शरदचंद्र पवार पक्षाच्या (NCP SP) जिल्हाध्यक्षपदी मोहिते पाटील यांनी आपला माणूस बसवून पक्षावर पुन्हा एकदा वर्चस्व मिळविण्याच्या दृष्टीने वाटचाल सुरू केल्याचे दिसून येत आहे.
राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील यांच्या सहीचे पत्र देऊन वसंतराव देशमुख यांना पक्षवाढीसाठी प्रयत्न करण्याचे आवाहन करण्यात आले आहे. तसेच, ज्येष्ठ नेते शरद पवार (Sharad Pawar) यांचे विचार आणि धोरणे समाजात तळागाळात पोचविण्याचे काम करावे, असे आवाहन प्रदेशाध्यक्ष जयंत पाटील यांनी पत्रातून केले आहे.
वसंतराव देशमुख हे पंढरपूरमध्ये (स्व.) सुधाकरपंत परिचारक यांचे समर्थक म्हणून राजकारण करायचे. पंढरपुरात ते परिचारकांसोबत असले तरी देशमुख यांचे राजकीय गॉड फादर मोहिते पाटीलच होते, हे अनेकदा दिसून आले आहे. लोकसभा निवडणुकीपर्यंत ते माजी आमदार प्रशांत परिचारक यांच्यासोबत होते.
सोलापूर जिल्हा परिषदेचे माजी सदस्य म्हणून वसंतराव देशमुख यांनी काम केले आहे. तसेच, पंढरपूर कृषी उत्पन्न बाजार समिती, पंढरपूर पंचायत समितीचे सभापती होते. तसेच, देशमुख हे पांडुरंग सहकारी साखर कारखान्याचे उपाध्यक्षही होते. मोहिते पाटील यांचे निकटवर्तीय आणि परिचारकांची खंबीर साथ यामुळे देशमुख यांना सत्तेची पदे मिळत गेली.
मोहिते पाटील यांनी माढा लोकसभा मतदारसंघातून भाजपच्या विरोधात बंड केल्यानंतर वसंतराव देशमुख यांनीही परिचारकांची साथ सोडत मोहिते पाटील यांच्यासाठी प्रचार मोहीम राबवली होती. तसेच, विधानसभा निवडणुकीत पंढरपूर मंगळवेढा मतदारसंघातून राष्ट्रवादी काँग्रेस शरदचंद्र पवार पक्षाकडे उमेदवारीची मागणी केली होती. मात्र, पक्षाने आता वसंतराव देशमुख यांच्याकडे जिल्हाध्यक्षपदाची धुरा सोपविली आहे. त्यामुळे आगामी स्थानिक स्वराज्य संस्थांच्या निवडणुकीच्या पार्श्वभूमीवर वसंतराव देशमुख यांची झालेली निवड महत्त्वपूर्ण मानली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.