Sambhajiraje Chhatrapati: विशाळगड अतिक्रमण आंदोलन; संभाजीराजे छत्रपती यांच्यासह 50 जणांवर गुन्हा दाखल

Kolhapur News: किल्ले विशाळगड अतिक्रमण विरोधात पुकारलेले आंदोलन माजी खासदार संभाजीराजें छत्रपती यांना भोवणार असल्याचे दिसते. याप्रकरणी संभाजीराजे छत्रपती यांच्यासह 50 जणांवर गुन्हा दाखल करण्यात आला आहे. जिल्हा पोलिसांची ही कारवाई केली आहे.

बेकायदेशीर जमाव जमवणे, सार्वजनिक मालमत्तेसह साहित्यांचा तोडफोड करणे, बंदी आदेशाचे उल्लंघन केल्याप्रकरणी 50 जणांवर गुन्हा दाखल करण्यात आले आहे. दहापेक्षा अधिक कलमे लावण्यात आली आहे. शाहूवाडी पोलिस ठाण्यामध्ये गुन्हा दाखल करण्यात आला असून काही जणांना ताब्यात घेण्यात आले आहे.

कोल्हापुरातील विशाळगडावर काही अज्ञात व्यक्तींकडून काल (रविवारी) दगडफेक करण्यात आली असल्याचा आरोप स्थानिकांनी केला आहे. या घटनेनंतर विशाळगडावर असलेलं अतिक्रमण हटवण्याच्या मागणीसाठी संभाजीराजे विशाळगडावर गेले होते. किल्ले विशाळगडावरील बेकायदेशीर अतिक्रमणाचा मुद्दा चांगलाच पेटला आहे.

माजी खासदार संभाजीराजे छत्रपती यांनी किल्ले विशाळगडावरील बेकायदेशीर अतिक्रमण विरोधात आक्रमक भूमिका घेतली आहे. विशाळगड परिसरात मोठा तणाव निर्माण झाला होता. स्थानिक नागरिकांकडून ही जमावावर दगडफेक झाल्याचा आरोप हिंदुत्ववादी संघटनेकडून करण्यात येत आहे.

छत्रपती संभाजी राजे विशाळगडावर पोहोचल्यानंतर जिल्हा पोलिस अधीक्षक महेंद्र पंडित यांनी आंदोलन मागं घेण्याची विनंती केली. मात्र,अतिक्रमणाबाबत निर्णय होत नाही तोपर्यंत मागे हटणार नाही अशी भूमिका संभाजी राजे छत्रपती यांनी घेतली होती. यानंतर जिल्हाधिकारी अमोल येडगे घटनास्थळी दाखल झाले.

त्याठिकाणी दगडफेक झाल्याने घरे, दुकांनाचे नुकसान झाले. जिल्हाधिकारी अमोल येडगे आणि जिल्हा पोलीस अधीक्षक महेंद्र पंडित यांनी विशाळगड अतिक्रमण मुक्त करण्याची मोहीम हाती घेणार असल्याचं आश्वासन दिल्यानंतर जमाव शांत झाला.