BJP Politics: इचलकरंजीत भाजपने बॉम्ब फोडला, राष्ट्रवादीवर नाराज होत विठ्ठल चोपडेंसह मातब्बरांनी पक्ष सोडला

Ichalkaranji News: इचलकरंजी महापालिका निवडणूकीच्या पार्श्वभूमीवर शहरात राजकीय भूकंपाचे हादरे बसण्यास सुरुवात झाली आहे. पहिल्या टप्प्यात भाजपमध्ये पक्ष प्रवेशाचा मोठा बॉम्ब फोडला आहे. माजी उपनगराध्यक्षांसह 13 जणांनी मंगळवारी (ता.14 ऑक्टोबर) भाजपमध्ये प्रवेश केला आहे.

राष्ट्रवादीचे जिल्हाध्यक्ष न मिळालेल्या प्रदेश सरचिटणीस विठ्ठल चोपडे यांनी उपमुख्यमंत्री अजित पवार (Ajit Pawar) यांच्या राष्ट्रवादीला रामराम ठोकत भाजपमध्ये जाण्याचा निर्णय घेतला. प्रदेशाध्यक्ष रवींद्र चव्हाण यांच्या उपस्थितीत जवळपास 13 जणांचा पक्षप्रवेश झाला आहे. यामध्ये उपनगराध्यक्षांसह काही मातब्बरांचा समावेश आहे.

पक्षप्रवेश केल्यानंतर त्यांची भाजपकडून (BJP) महापालिकेसाठी उमेदवारी निश्‍चित समजली जाणार आहे. काही दिवसांपासून राजकीय हालचालींना वेग आला आहे. विशेषतः पुन्हा एकदा भाजपमध्ये इनकमिंगला जोर आला आहे.

पहिल्या टप्प्यात राष्ट्रवादी काँग्रेस पक्षाचे (अजित पवार गट) प्रदेश सचिव विठ्ठल चोपडे यांच्यासह दोन माजी उपनगराध्यक्ष, चार माजी नगरसेवक व दोन माजी नगरसेविका भाजपमध्ये केला आहे.

रवी रजपुते, अजित जाधव, तानाजी हराळे, प्रधान माळी, शुभांगी माळी, सचिन हुकिरे, राजू खोत, श्रीकांत कांबळे आदींनी केला. भाजप पक्षप्रवेश केल्याने महाविकास आघाडीसह महायुतीतील राष्ट्रवादीलादेखील धक्का मिळाला आहे. भाजपचे प्रदेशाध्यक्ष रवींद्र चव्हाण यांच्या हस्ते व आमदार राहुल आवाडे यांच्या उपस्थितीत सदरचा पक्ष प्रवेश पार पडला.

मंत्री मुश्रीफ यांना दुसरा धक्का दिला आहे. काही दिवसापूर्वी मुरुगुडचे नगर परिषदेचे नेते आणि शेतकरी संघाचे माजी अध्यक्ष प्रवीणसिंह पाटील यांनी भाजपमध्ये प्रवेश केला होता. त्यानंतर विधानसभा निवडणुकीत विठ्ठल चोपडे यांनी बंड करत इचलकरंजी विधानसभा मतदारसंघातून निवडणूक लढवली होती. त्यानंतर पुन्हा त्यांनी राष्ट्रवादी काँग्रेस मध्ये पक्षप्रवेश केला होता. त्याला सहा महिने उलटले नसताना चोपडे यांना भाजपने गळाला लावले.