Nagpur violence : नागपूर दंगलीवर प्रकाश आंबेडकरांचा धक्कादायक दावा, "या कटात एक विषारी मंत्री"; कोणाकडे रोख?

Mumbai News : छत्रपती संभाजीनगरमध्ये असलेल्या औरंगजेबाच्या कबरीवरून राज्यात वाद उसळला आहे. हिंदुत्ववादी संघटनांपासून राजकीय नेत्यांपर्यंत सर्वांची मागणी कबर हटवण्याची आहे. अशातच हा वाद आणखी पेटला असून नागपूर शहरातील महाल परिसरात हिंसाचार झालाय. दोन गटांत झालेल्या दंगलीमुळे शहरातील नागरीकांमध्ये भीतीचे वातावरण तयार झाले आहे. या पार्श्वभूमीवर वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी मोठा दावा करताना गंभीर आरोप करत केले आहेत. त्यांनी महायुती सरकारवर जोरदार निशाना साधताना या दंगलीला एका मंत्री कारणीभूत असल्याचं म्हटलं आहे.

नागपूर शहरात दोन गटांत झालेल्या दंगलीच्या पार्श्वभूमीवर भाजपच्या आमदाराने मोठा दावा करताना बाहेरून लोक आले होते असे म्हटलं होते. तर याप्रकरणावर विधानसभेत निवेदन सादर करताना पोलिसांवर ज्यांनी हल्ला केला आहे, अशांना सोडणार नाही. तर कोणालाच कायदा हातात घेऊ देणार नसल्याचे मुख्यमंत्री देवेंद्र फडणवीस यांनी म्हटलं आहे.

यादरम्यान आता प्रकाश आंबेडकर यांनी दंगलीच्या पार्श्वभूमीवर मोठा दावा करताना सत्ताधाऱ्यांवर टीका केली आहे. प्रकाश आंबेडकर यांनी महायुती सरकारवर निशाना साधताना, "महाराष्ट्राचा एक विषारी मंत्री उघडपणे समाजात द्वेष पसरवत आहे आणि समाजात फूट पाडण्याचा प्रयत्न करत आहे. एवढेच नाही, तर महाराष्ट्रात द्वेष पसरवण्यासाठी बाहेरून लोकांना आणले जातय", असाही दावा प्रकाश आंबेडकर यांनी मंत्री नितेश राणे यांचे नाव न घेता केला आहे.

तसेच आंबेडकर यांनी हे देखील स्पष्ट केले की, "हे सर्व एका मोठ्या सुनियोजित कटाचा भाग आहे. यामुळे नागपूरसह सर्व नागरिकांना आपण आवाहन करतो की, अफवांकडे लक्ष देऊ नका आणि शांतता राखा." सामाजिक सलोखा बिघडवण्याच्या हालचालींमागे असलेल्या शक्तींवर लक्ष केंद्रीत करण्याची गरज असल्याचेही त्यांनी अधोरेखित केलं आहे.

दरम्यान याच मुद्द्यावरून शिवसेना ठाकरे गटाचे नेते भास्कर जाधव यांनी थेट नितेश राणे, निलेश राणेंचं नाव घेत त्यांचा बोलवता धनी कोण? असा सवाल केला आहे. भास्कर जाधव यांनी, कोण नितेश राणे? नितेश राणे, निलेश राणेंचा बोलवता धनी कोण? नितेश राणेंच्या मागे एक संघटना आहे. एक व्यक्ती असं करु शकत नाही. यामध्ये संघटना आहे, सरकार आहे. महाराष्ट्राचं वातावरण बिघडवण्याचा प्रयत्न सुरु असल्याचा दावा देखील भास्कर जाधव यांनी म्हटलं आहे.