PMC News: ​पुण्यात गल्लीबोळातील 'नावाच्या' राजकारणाला चाप! प्रशासनाने शोधला 'जालीम' उपाय

Pune News: पुण्यात एखाद्या गल्लीला कोणाचं नाव द्यायचं? यावरून महापालिकेत तासन् तास चर्चा होतात, वाद होतात आणि कधी कधी तर राडाही होतो. 'आमच्याच नेत्याचं नाव कसं नाही?' इथून सुरू झालेला हा श्रेयवाद मिटवण्यासाठी आता पुणे महापालिका प्रशासनाने एक 'जालीम' उपाय शोधला आहे.

पुणे महापालिकेत सध्या या नव्या प्रस्तावाची जोरदार चर्चा सुरू आहे. रस्ते आणि चौकांच्या नामकरणावरून होणारा राडा, स्थानिक नेत्यांमधील श्रेयवाद आणि महापालिकेच्या सभागृहात उडणारे खटके या सगळ्याला पूर्णविराम देण्यासाठी प्रशासनाने आता एक मोठी खेळी खेळली आहे. ज्या रस्त्यांची रुंदी ९ मीटरपेक्षा कमी आहे, अशा गल्लीबोळांना आता कोणत्याही थोर व्यक्तीचे किंवा नेत्याचे नाव न देता थेट 'क्रमांक' देण्याचा प्रस्ताव समोर आला आहे.

पुणे शहरात गल्लीबोळांना नाव देण्यासाठी स्थानिक नगरसेवकांमध्ये नेहमीच चढाओढ असते. पण आता महापालिका प्रशासनाने नियमावलीच बदलली आहे. नव्या प्रस्तावानुसार, ९ मीटरपेक्षा कमी रुंदीच्या रस्त्यांचे नामकरण केले जाणार नाही. त्याऐवजी त्यांना 'गल्ली क्रमांक १, २, ३' अशा पद्धतीने ओळख दिली जाईल. यामुळे नावासाठी होणारी ओढाताण आपोआपच थांबणार आहे.

जर एखाद्या विशिष्ट गल्लीला नाव द्यायचेच असेल, तर केवळ सत्ताधारी पक्षाच्या किंवा बहुमताच्या जोरावर ते शक्य होणार नाही. त्यासाठी महापालिकेच्या सर्वपक्षीय सदस्यांची एकमताने संमती आवश्यक असणार आहे.

'स्ट्रीट नंबर'

परदेशात ज्या पद्धतीने तिथे 'स्ट्रीट नंबर' असतात. त्याच धर्तीवर पुण्याचा चेहरामोहरा बदलण्याचा प्रशासनाचा प्रयत्न आहे. मात्र ​हा प्रस्ताव सध्या पक्षनेत्यांच्या बैठकीत अंतिम निर्णयासाठी जाणार आहे. प्रशासनाच्या या निर्णयावर स्थानिक नेते नाराज होण्याची शक्यता असल्याने नेमका यावर काय निर्णय घेतला जाणार हे पाहणं महत्त्वाचं ठरणार आहे.